– Allaffimmi ingerlatsinermik tunngaveqarpallaarluni ingerlatsineq
Raajarniaq Jørgen Eriksen aalisarnermik nakkutilliinermi malittarisassat nutaat pillugit taama oqarpoq. - Allaannginnami oqartussat aalisarnermik inuussutissarsiortunut tatiginninngitsut, nangilluni oqarpoq.
Namminersorlutik Oqartussat Nunatsinni aalisarnermut nakkutilliinerminni malittarisassanik sakkortunerulersitsinerat, sinerissamut qanittumi aalisartunut allaffissornerulernermik suliakkersuutaalerpoq, allaffimmilu ingerlatsinermik tunngaveqarpallaarluni.
Aalisartunit oqaaseqartitaq Jørgen Eriksen Sermitsiamut taama oqarpoq.
Oqartussat soorlu piumasaraat, aalisartut atortunik qaammataasakkoortumik nassitsinermi atortussanik pisissasut ikkussuillutillu, taamaalillutillu Kanuaanamut nalunaaruteqarsinnaalerniassagamik.
- Ulluinnarni aalisarnitsinni atortut nutaat aalisarnerput ilungersunarnerulersippaat suliakkersuutaanerullunilu. Tamanna allaffissornermik ingerlatsinerujussuuvoq, Jørgen Eriksen Sermitsiamut oqarpoq.
Sinerissamut qanittumi aalisartoq 50-inik ukiulik nammineq kilisaataateqarpoq. KNAPK-p raajarniarnermut siunnersuisoqatigiivini siulittaasutut angallatinut raajarniartunut minnerusunut oqaaseqartartuuvoq. Taanna Ilulissaneersuuvoq Nuummilu najugaqarluni. Raajarniap taassuma aalisarnermik nakkutiliinissamut nalunaarut nutaaq qaammatip ataatsimip missaata matuma siornagut atuutilersoq qatsulluinnarpaa.
Aalisartut tamarmik aalisariutini elektronikikkut atortut nutaat pisariunerannut allaffissornermullu ernumanartoqartitsipput, Jørgen Eriksen oqarpoq.
Allaaserisaq tamaat uani Sermitsiami atuaruk: