isornartorsiuneq
Allaaserisaq RAL-imit isornineqartoq
Sermitsiaq.AG-ip januarip 21-ani allaaserisaa 'RAL-p qarasaasiatigut ajornartorsiutai suli qaangiutinngitsut', Royal Arctic Line-p narrujuummissutigaa.
'Royal Arctic Line Sermitsiaq.ag-mut: Royal Arctic Line soorunami ingerlaavartumik pitsanngoriartorpoq!'. Umiarsuaatileqatigiiffiup tusagassiuutinut nalunaarutaa taama qulequtaqarpoq.
Allaaserisaq 'RAL-ip qarasaasiatigut ajornartorsiutai suli qaangiutinngitsut'-mik qulequtalik tusagassiuutinut nalunaaruteqarnermik tunngaveqarpoq.
Tassani RAL-ip pisortaanerata tullia Taitsiannguaq Olsen oqaaserisaa ima issuarneqarpoq:
- Qarasaasiatigut ajornartorsiutinut atatillugu systemip pitsanngorsarnissaa ilungersuullugu sulissutigaarput, tassungalu atatillugu pitsanngorsaat martsip qaammataani pisinnaanissaa naatsorsuutigaarput.
Piffissami tassani it-systemimut atuisut pikkorissartinneqarnissaat ukioq manna 1. kvartalimi pilersaarutigineqartoq ilanngullugu oqaluttuaraa.
RAL-ilu pitsanngorsaanerit pikkorissaanerillu pillugit allappoq:
- Ukiup aallartinnera angallaviunnginnerpaasartoq atorluarlugu, aaqqiissuussinermut tunngasut Royal Arctic Line-ip soorunami aaqqiivigerusuppai. Aamma piffissaq taanna soorunami sungiusarnermut ilinniagaqarnermullu atorusuppaa. Soorunami aamma piffissami ingerlaavartumi sullitat sullinneqarneranni Royal Arctic Line pitsanngoriartortuarusuppoq. Suliffeqarfissuup ineriartornera qaquguluunniit uninnavianngilaq, aamma IT-kkut aaqqissuussinikkut ineriartorneq uninnavianngilaq. Aaqqissuussaaneq siuliani atorneqartoq ukiut 20-ngajaat ineriartortinneqarpoq, taamaammat aaqqissuussaanerup iluani pitsanngorsaanerit pissusissamisoorput pisariaqarlutillu.
Nangillunilu allassimasoqarpoq:
- Royal Arctic Linep allannguinerata qulakkiissavaa, siunissami niuernikkut Kalaallit Nunaata aatsaat taama ammatigilernissaa. Allannguinerit tamakku allannguinerpassuarnik nassataqartarput, aamma suliffeqarfissuup iluani. IT-kkut aaqqissuussinerup iluani unammillernartut 2017-imi nalaatatta takutippaat, allannguiartuaarnerit naatsorsuutigisamiit sivisunermik ingerlasarnissaat. Tamannalu ajunngitsunik ajunngippallaanngitsunillu peqquteqarpoq. Pingaarnerli tassaavoq, maanna Royal Arctic Line ukiup ataatsip iluani pisimasunik atorluarsinnaasanik misilittagaqalermat, aali qaammatit 18-iinnaat periarfissaralugit, angallannerup nutaamik aaqqissuussiffigineqareerluni atuutsinneqalernissaata tungaanut. Tassami 2017-imut isersimanngitsuugutta taama periarfissaqarnavianngikkaluaratta.
Attaveqatigiinnermulli Naalakkersuisoq Erik Jenseni Sermitsiaq.AG-mit aamma oqarsimaganeraasoq, RAL-i isumaqarpoq.
RAL-ip tusagassiuutinut nalunaarutaa tamakkiisoq uani atuarsinnaavat.
Allaaserisaq RAL-ip isornartorsiungaa uani atuarsinnaavat.