isumaqatigiinniarnerit
Alianartumik pisoqareersoq isumaqatigiinniarnerit unitsinneqarallarput
Naalakkersuisunngortitsinissamut isumaqatigiinniarnerit unitsinneqarallartut Siumup siulittaasuata isumaqatigiinniarnerillu siuttuata Kim Kielsenip ullaaq aalajangerpaa
Partiit ilaata siulittaasuata ilaqutarisaani toqusoqarsimanera peqqutaalluni ataatsimiinnissaraluit unitsinneqarput.
- Alianartumik pisoqarsimanera peqqutigalugu ullumikkut ataatsimeeqateqassanngilanga. Ullumikkut ataatsimiinnissaagaluit tamarmik unitsinneqarput, Kim Kielsen nassuiaavoq.
Siumup partiinik allanik ullumikkut ataatsimeeqateqarnissaagaluani tamaasa aqagumut kinguartippai. Allaffik kisimi ammavoq ullunilu kingullerni atatasimiinnerni oqaluuserineqarsimasut siulersuisuunerit allaqqissaarlugit nangissavaat.
Atuaruk: Urani Siumup aamma Partii Naleqqap isumaqatigiinngissutigaat
Atuaruk: Partiit siullermeerlutik isumaqatiginninniarlutik ataatsimiinnerat naammassivoq
Periarfissat tamarmik ammatinneqarput
Partiit allat naalakkersuisooqataanissamut kissaatigisinnaasatik tamaasa Siumumut allaganngorlugit ippassaq tunniuppaat.
- Taakku ullumikkut qimerluuataassavavut nalilersorlugillu, isumaqatigiinniarnerilli aqagu aatsaat nangeqqissavavut, Kim Kielsen oqarpoq.
Isumaqatigiinngissutigineqarsinnaasunik, soorlu uranimut tunngatillugu suli isumaqatigiinngissuteqartoqarsinnaagaluartoq partiit tamarmik naalakkersuisooqataalernissaminnut suli periarfissaqarnerpai.
- Partiit tamarmik suli periarfissaqarput, erseqqissaavoq.
Kim Kielsen sapaatip-akunneri arfinillit missaanni qaangiutsinnagit naalakkersuisunngortitsinissaminut periarfissaqarpoq.
Naalakkersuisunngortitsinissamut isumaqatigiinniarnerit ajornartorsiutitaqanngitsumik ingerlassappata naalakkersuisut nutaat decemberip 12-iani 2014-imi tamanut nalunaarutigineqarsinnaalissasut Inatsisartut siulittaasorigallagaata Lars-Emil Johansenip ippassaq ilisimatitsissutigaa.
Atuaruk: Isumaqatigiinniarnerit: Ataatsimiinnerit siulliit aallartinneqarput