Alianartoq: Qaartoqarnerani niviarsiaraq ajunaartoq
Sisimiut eqqaanni Sarfannguit kitaanut qaangerlugu illuaqqami qaartoqarnerani, niviarsiaraq 13-inik ukiulik ajunaarpoq. Niviarsiaraq alla 14-inik ukiulik timimigut uutsiterujussuarpoq. Kalaallit Nunaanni Politiit pisoq uppernarsarpaat.
Sarfannguit ungasinngisaanni illuaqqami qaartoortoqarnerata kingorna niviarsiaraq 13-inik ukiulik ajunaarpoq. Niviarsiaraq niviarsiaqqamik allamik inersimasumillu peqateqarluni illuaqqamukarsimavoq. Niviarsiaqqap aappaa, 14-inik ukiulik, uutsiterujussuarpoq, inersimasorlu tupaqqarujussuarluni.
- Uppernarsarsinnaavara kangerlummi qaartoqarneranik Sisimiut politiivi ullumi nalunaaqutaq 11.45 nalunaarfigineqarmata. Qaarpallanneq kangerlummi arlalinnit tusaaneqarsimavoq, Kalaallit Nunaanni Politiini pigaartut pisortaat, Aqqaluk Petersen Sermitsiaq.AG-mut oqaluttuarpoq.
Qaartoqarnerani ikuallattoqalerpoq. Sarfannguanit qatserisartut qamisaapput. Sisimiuniillu ikiuukkiartortut nalunaaqutaq 13.00 kingorna tikiullutik.
Paasiniaasoqarpoq
Politiit paasisaat naapertorlugu gassiisiviit marluk illuaqqamiitinneqarsimapput. Inuit politiinut saaffiginnittut arlallit qaarpallannik marlunnik malisugaannartunik tusarsimapput.
- Inersimasoq niviarsiaqqanik marlunnik illuaqqameeqateqartoq oqaloqatigineqarsinnaasimanngikkallarpoq, tupaqqanera pissutigalugu. Taamaammat qaarnerani susoqarpiarsimanera suli ilisimanngilarput, Aqqaluk Petersen nassuiaavoq.
Pigaartut pisortaat nassuiaavoq pisoq paasiniaaffigineqartoq, pisumilu qanigisaasut ilisimatinneqarsimasut.