- Alianarpoq: Siulittaasup Qaqortumi immikkoortortaqarfimmit attaveqarfigineqarnissani naatsorsuutigaa
Ivaaqqami arnat taamaallaat unnuarsiortuusarnissaannik aalajangiisoqarsimanera, SIK-mi siulersuisuunerni siulittaasup naammaginngilaa. Ukiumut akissarsiat ajornerunerannut tunngaannanngilaq – naligiissitaanermut aamma tunngavoq, taanna oqarpoq.
Ulloq unnuarlu paaqqinnittarfimmi Ivaaqqami arnaannaat unnuarsiortarnerat maluginiarneqanngitsuunngilaq.
Ivaaqqami aqutsisuni aalajangiunneqartoq alianartuusoq, SIK-mi siulittaasoq isumaqarpoq.
Siullermik assigiinngisitsinerusoq isumaqarpoq. Ilaatigut angutit nunatsinni sumiiffinni allani unnuarsiortarmata.
- Aningaasat tassaniipput: unnuarsiortarnermi. Tassa imaappoq, angutit paaqqinnittarfimmi sulisut arnanit sulisunit ukiumoortumik akissarsiaat ajornerupput.
Najukkami immikkoortortaqarfimmit attaveqarnissaq
Jess G. Berthelsenip ajornartorsiut annertunerarpaa, tassami sulisut ataasiakkaat assersuutigalugu aningaaserivimmi ukiup ingerlanerani isertitassatik naatsorsuutigisatik malillugit taarsigassarsiniartarmata.
- Tamatuma (aalajangernerup, aaqq.) angutit isertitaasa naatsorsuutigisimasaannit annikinnerulersippaat.
Suliaq pineqartoq tunuliaqutigalugu SIK-mi siulersuisuunerit Qaqortumi immikkoortortaqarfimmit attaveqarfigineqarnissartik, siulittaasup naatsorsuutigaa.
- Tassanngaanniit tigussavarput, taanna oqarpoq.
Jess G. Berthelsenip oqarnera naapertorlugu akissarsianuinnaq tunnganani naligiissitaanermut aamma tunngavoq:
- Naligiissitaasoqarnissaa tamatta suaartaatigaarput, kisianni taamatut iliuuseqarneq tamatuma akerleraa, taanna oqarpoq.
Aqutsisut aalajangernerat paasisinnaanngiliuk?
- Kina oqarami arnat kannguttaatsuliorneq ajortut?
Siulittaasoq akivoq.