Skip to main content

Alfred Jakobsen toqukkut qimaguppoq

Naalakkersuisuusimasoq aamma KNAPK-mi ICC-milu pisortaasimasoq Alfred E. Jakobsen sivisuumik napparsimareerluni februaarip aqqaneq-aappaani toqukkut qimagussimavoq.

Arlaannannulluunniit attuumassuteqanngitsumi Oceans Northimi pisortaq Alfred E. Jakobsen sivisuumik napparsimareerluni toqukkut qimagussimavoq. 2020-mi aasakkut uummatimigut pilatsinnermi kingorna 2020-mi aggustusip 25-ani qaratsamigut aanaartoorsimavoq, tamatumalu kingunerluutaanik atuisimalluni.

Alfred E. Jakobsen Nuummi utoqqaat illuanni ilaquttaminik najorneqarluni februaarip aqqaneq-aappaani toqukkut qimaguppoq.

Alfred E. Jakobsen 1958-imi Arsummi inunngorpoq. Qimatarai panini sisamat nulianilu Aviaaja Rosing Jakobsen.

- Naggatissani tikillugu akiuukkaluarpoq, sumulli ingerlasoqarnersoq ilisimalluarsimavaa, Aviaja Rosing Jakobsen Sermitsiaq.AG-mut oqarpoq.

- Asanningaartumik ataataallunilu ittuuvoq. Tamatsinnut annertuumik asannittuuvoq, aamma soralussaminut. Suliamut tunniulluarsimasuullunilu ataqqinnittuuvoq, aamma avatangiisit pillugit sorsuuteqartuaannarsimavoq. Maqaasineqassaaq, nulia oqarpoq.

Kalaallit kulturiannik paasisaqartitsisartoq

Namminersorlutik Oqartussat tusagassiorfinnut nalunaaruteqarnerminni allapput:

- Alfred Jakobsen suliniarluartuusimavoq, kulturitsinnik pinngortitamillu najukkatsinnik pingaartitsisoq. Tamatigut tunniusimalluarluni pinngortitamik, immami pinngortitamik aamma nungusaataanngitsumik aalisarnermik illersuisuusarsimavoq. Eqqugassani ersiginagit Kalaallit Nunaanni pinngortitaq avatangiisillu pillugit oqallinnermut akuusarsimalluni. Aamma innuttaasuni ilisimasat aammalu pinngortitamik avatangiisinillu ilisimanninnerit nukittorsaaffiginiarlugit annertunerusumik siaruarteriniarluni siammasinnerusumillu oqallitsitsiniarluni kaammattuisarsimavoq.

- Alfred Jakobsen inussiarnersuugami, ammasuugami isumagissaartuullunilu Avatangiisinut Pinngortitamullu Pisortaqarfimmi pisortaagallarami suleqatini illersugarisarpai, aammalu misilittagarpassuarminik ilisimasarpassuarminillu tuniorartarsimallugit. Sulisorpassuit Alfred E. R. Jakobsen ilitsersuisumittut, kulturerput, pinngortitaq avatangiisillu pillugit ilisimasaqalersitsisutut paasisimasaqalertitsisutullu oqaatigisarpaat. Alfred pisortaasimavoq suleqataasimallunilu naatsorsuutigineqarsinnaajuaannartoq, aammalu misilittagarpassuaqarami tunniusimalluarlunilu pisuni ataqatigiinni amerlasuuni suleqatitut tatigisaasimavoq. Amerlaqaluta maqaasisussaavarput, aammalu eqqaamaneqartuaannartussaavoq.

Avatangiisinik nungusaataanngisumillu ingerlatsinissamik sorsuuteqartuartoq

Alfred E. Jakobsen toqussani tikillugut arlaannaannulluunniit attuumassuteqanngitsumi Oceans North Greenlandimi, nungusaataanngitsumik aalisartoqartarnissaanik sulissuteqartumi pisortaavoq. Oceans North Greenlandimi siulittaasup tullia Christopher Debicki suleqatini pillugu imatut oqarpoq:

- Alfred 2015-imili arlaannaannulluunniit attuumassuteqanngitsumik Ocean Northimik ingeriartortitseqataasimavoq aamma Kalaallit Nunaanni Canadamilu ataatsimoorluta ernumassutigisatsinnik suussuserseqataasarlunilu innuttaasut takorluugaannik ataatsimoorlutalu imartatta peqqissuujuarnissaanik tunisaqartarnissaanillu sorsuuteqaqataasarsimallui.

- Alfred issittup imartaani nunanit tamalaaneersut aalisarnermi isumaqatigiissutissaannik isumaqatiginninniartoqarnissaanut atsiortoqarnissaanullu 2018-imi partiit qulit qularunnaarsinniarneqarneranni qitiusumik suliaqarsimavoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER