Aleqa: USA Kangerlussuarmik akiliisinniartigu
Aleqa Hammondip siunnersuutigaa Kangerlussuup mittarfiata ingerlannera tassungalu aningaasartuutit USA-p tigussagai.
Kangerlussuup nutarsarneqarnissaa siunissamilu ingerlanneqaannarnissaa USA-p akiligassagaa, Aleqa Hammondip (NQ) kissaatigaa.
Taanna isumaqarpoq suleqatigiinnissamut isumaqatigiissut amerikamiut illersornissamut ministeriata tullianit, John Roodimit siorna atsioqataaffigineqartoq, pillugu amerikamiut malitseqartinniarneqartariaqartut. Illersornissamut ministerip tulliata atsioqatigiinnermi nalunaarutigaa nunatsinni mittarfiit, innuttaasunit sakkutuuniillu ataatsikkut atorneqarnissaat misissuiffigineqassasoq.
- Amerikamiut Kalaallit Nunaanni mittarfinnik tapersersuinissartik kissaatigippassuk, Kangerlussuup aserfallatsaalinera ingerlanneqarneralu tigoqqissinnaavar, maanna Nuummi Ilulissanilu mittarfiit nutaat Kalaallit Nunaannut Atlantiku qulaallugu timmisartuussineq tigusussanngormassuk, Aleqa Hammond (NQ) tusagassiutinut nalunaarummini oqarpoq.
- Kangerlussuaq USA-mik isumaqateqarnermut ilaareerpoq imminilu sakkutooqarfitoqaalluni. Taava aamma USA taamaasilluni Pituffimmi sakkutooqarfimmi isertitassanik annaasaanik isertitsissinnaalissangaluarpaa.
Tassunga tunngatillugu Aleqa Hammond ministeriunermut Lars Løkke Rasmussenimut (V) apeqquteqarpoq paasiniarlugu taassuma 'USA-p Illersornissamut Ministeriata Tullianit John Roodimit atsiorneqarsimasumik peqatigiinnissamut isumaqatigiissut Kangerlussuup atatiinnarneqarnissaa USA-mit akiliinikkut isumaqatigiinniarnissaq pillugu pilersitsinermi ingerlatsinermilu tapersersuinissamik imaqartoq malitseqartissimaneraa'.