naalagaaffeqatigiinneq
Aleqap qallunaat ministeriat isornartorsiorpaa
Aningaasanut inatsisip isumaqatigiinniutigineqarnerani mattussaasimanertik naammaginagu Siumut IA-lu oqarnikuupput. Aleqa Hammondip aningaasanut ministeri Claus Hjort Frederiksen (V) ataatsimeeqatigisimavaa
Siumut tunuliaqutaralugu folketingimut ilaasortap Aleqa Hammondip aningaasanut ministeri Claus Hjort Frederiksen (V) ataatsimeeqatigisimavaa, kalaallit partiivisa oqaatigereeraallu savalimmiormiut assutigalugu Danmarkimi aningaasanut inatsisip isumaqatigiinniuitigineqarnerani mattussaasimanertik naammaginagu.
Ministeri isornartorsiorpaa
– Pisimasup ingerlarnga naammagisinnaanngilarput. Folketingimi partiitut allatulli naligiissitaasussaavugut, taamaattumillu aningaasanut inatsisip isumaqatigiinniutigineqarnerani oqaloqatigiinnissamut qaaqquneqarsimasariaqaraluarluta nunatsinni pissutsit, qallunaat inatsisitigut oqartussaaffiisa, tusarneqarnissaat qulakkeerniarlugu, Aleqa Hammondip ministeri ataatsimeeeqatigigamiuk taamatut oqarfigaa.
Savalimmiormiut Folketingimi partiivi kalaallit partiivisut isumaqatigiinniarnerni peqataanissaminnik kissaateqarsimanngillat.
Siumumit politikerip kissaatiginartillugu oqaatigaa qallunaat-kalaallit Kalaallit Nunaanni aningaasaliissuteqarnermut ataatsimut suliniuteqarnissaat, inuussutissarsiornermik tamatigoortunerusumik pilersitseqataasinnaasumik.
Siumup paasissutissiissutigaa aningaasanut ministerip paasisimagaa naalakkersuisut nalunngikkaat, Danmarki Kalaallit Nunaanni inuussutissarsiutinut nutaanut siunissami aningaasaliissuteqarnissaminut soqutigisaqartoq.
Oqartussaaffik sumiginnagaq
Taamatuttaaq kissaatigineqarpoq upalungaarsimanerup pitsaanerulersinnissaa. Upalungaarsimanikkut iliuuseqartoqartariaqarpoq, Issittumi ingerlatat amerligaluttuinnartut isumagineqarnissaannut atortussaqarumalluni.
Aleqa Hammondillu ujartorpaa qallunaat eqqartuussisoqarnikkut politeeqarnikkullu annertunerusumik iliuuseqarnissaat.
– Kalaallit Nunaanni eqqartuussiveqarneq politeeqarnerlu sumiginnagaasimapput ullutsinnullu naapertuutinngilluinnarlutik. Ajornartorsiutit nunatsinni eqqartuussiveqarnikkut takkuteqattaartuartartut piffissamut sivisuumut aaqqiivigineqartariaqarput.
– Aamma atorfissaqartinneqarpoq kalaallit politiivisa suliassaminnik Danmarkimisulli pitsaatigisumik ingerlatsinissaminnut aningaasanik atugassaqartinneqarnissaat, nunatsinni pissusiviusunut naapertuuttumik, Aleqa Hammond oqarpoq.
Ministeri tupaallappoq
Claus Hjort Frederiksenip tupaallaatigaa tusaramiuk nunaqarfinnit 60-init 14-it suli kommunefogedimik amigaateqartut, nunaqarfinnilu tamakkunani innuttaasut inatsisitigut isumannaatsuunissaat qulakkeerneqarsimanngimmat.
Aningaasanut ministerip naalakkersuisut ataatsimeeqatiginiarpai, Aleqa Hammondip saqqummiussai, ataatsimeeqatigiinnerminni oqaloqatigiiussutigisatik, oqaloqatigiissutiginiarlugit. Aningaasanut ministerip Aleqa Hammond ungasinngitsukkut malinnaatitsisumik ataatsimeeqatigeqqissavaa.