Aleqap peqquserlunnermut tunngasoq qisuariarfigaa

– Ilumoorpoq 1996-mi pineqaatissineqarama. Taamani angisuumik kukkussuteqarpunga. Kinguneri akuerivakka pisuussuteqarlungalu nassuerutigalugu. Soorunami akiitsukka akiligassiissullu akilerpakka. Piffissaq ingerlareersoq pisoq taanna qaangiutereersutut isigilerpara.
Taamatut tusagassiorfinnut nalunaarutikkut allappoq Naalakkersuisut siulittaasuat Aleqa Hammond, Siumut, aviisip ullormut saqqummersartup Berlingske-p allaaserereeraalu peqquserluuteqarsimasutut eqqartuunneqarsimasoq.
– Taamani iliuuserisimasakka soorunami ajuusaarutigivakka. Pisorli ukiut 17-t matuma siorna pisimasuuvoq. Inuuvunga allatulli oqaluttuassartalik. Isumaqarpunga qinikkatut iliuuserisakka angusarisakkalu aallaavigalugit nalilersorneqartariaqarlunga.
– Ilumoorpoq Berlingskemi allaarisaq pillugu annerusumik oqaaseqarusussimannginnama. Pineqartoq pisimasuuvoq uannut qaangiutereersimasoq naammassereersimasorlu annerusumik oqaaseqarfiginianngisara.
Aamma atuaruk: "Aleqa peqquserluttutut eqqartuunneqarsimavoq"
Facebookimi quppernermini Aleqa Hammondip qinnutigaa suliamigut nalilerneqaqqulluni, inuttut pissusilersornini pinnagit.