oqaaseqarneq
Aleqap ornigulluni utoqqatserfigineqarnissani naatsorsuutigaa
Akileraartarnermut ministerip oqaaseqarnera kalaallinut isiginnittariaasianut takussutissaavoq, Aleqa Hammond isumaqarpoq
Danskit akileraartarnermut ministeriata Kristian Lauritzenip (V) naalakkersuisut 'kalaallimik pisisimanerarlugit' oqaaseqarnermini ajoqusiinini killilerniarsaralugu ilungersorpoq.
SMS-ertoq
Ritzauimut allagaqarluni taassuma oqaaseqarnini utoqqatsissutigaa, Aleqa Hammondillu Facebookimi quppernera naapertorlugu SMS-ikkut utoqqatserniarsarisimavoq.
Atuaruk: Qallunaat naalakkersuisui 'kalaallimik pisisut'
- Asasara Aleqa. Naalakkersuisullu ilinnut isumaqatigiissuterput pillugu, nammineerlunga Lemvig Dagbladimi oqaaseqarnikka pillugit utoqqatserfiginiarlutit sianeraluarpunga. Taanna ataatsimiinnermi matoqqasumi oqarusersaarfiusupilussuarmi oqaatigineqarpoq, tusagassiortumillu peqataasoqartoq ilisimanngilara. Ajuusaarlunga ilinnut utoqqatserusuppunga, uannut sianersinnaavutit. Inussiarnersumik Karsten Lauritzen, Aleqa Hammond Facebookimini issuaavoq.
Atuaruk: Akileraartarnermut ministerip oqaaseqarnini utoqqatsissutigaa
Tamatuma saniatigut SMS-ikkut allagaq naammanngitsoq erseqqissaatigaa.
- Nammineq ornigulluni utoqqatsernissaa naatsorsuutigaara, Facebookimi allappoq.
Nalinginnaasumik isummiutereertakkatut nalileraa
Karsten Lauritzenip oqariartuutaa kalaallinut isiginninneranik takutisisoq nalilerpaa.
- Oqaatigiinnarusuppara taamatut oqaluttartoq. Kalaallit uagut pilluta taamatut oqaatigisarsimassavaatigut. Taamatut pisiarisassatut, Aleqa Hammond DR Nyhederimut taama oqarpoq.
Kalaallit Danmarkimi nalinginnaasumik immikkoortinneqartarnerannut DR-mut unnersuussuteqarpoq, tamanna ilaatigut inuit pisinnaatitaaffii pillugit immikkoortortaqarfiup nalunaarusiami allaaserineqarnikuuvoq.
- Taamatut oqaluttoqartarnera tupaallaatiginngilara. Kalaallit pillugit nalinginnaasumik isummertarnermut eqqaanarpoq, taanna DR-mut oqarpoq.