Folketingi

Aleqap missingersuutit affai sinnerlugit annaavai

Attaviitsutut Folketingimut ilaasortat aningaasat atugassarititat ikinnerusarput

Aleqa Hammond attaviitsutut siunnersortinik, allatsinut aamma ilinniartunik ikiortinut sulisitsinissamut partiimut tunuliaquteqarallarnerminit ikinnerujussuarnik aningaasanik pisartagaqalissaaq.

Politikerimut marlunngornermi Siumumit ilaasortaajunnaarsitaasumut piviusoq nutaaq maanna taama isikkoqalerpoq, Folketingip kreditkortianik atornerluinerup kingorna tamanna pivoq.

Tunuarnissani itigartitsissutigaa, maannalu attaviitsuuvoq. Suliarlu aamma pillugu Socialdemokraatit Aleqa Hammondimik suleqateqarnertik taamaatippaat.

Tunngaviusumik ipsartakkat annaagai
Attaviitsunngorami tunngaviusumik pisartakkanik taagorneqartut qaammammut 72.478 koruunit annaavai, taakku Folketingip partiip gruppiinut agguaattarpaat.

Folketingip inatsisaani tamanna atuarneqarsinnaavoq.

Aningaasat pissarsiariniaraanni partii Folketingimut sassartitaqarsinnaasariaqarpoq. Aningaasat tunniunneqartartut amerlassusaat partiip gruppiani folketingimut ilaasortat amerlassusaat apeqqutaatinneqartarpoq. Siumumut tunngatillugu partii pisartakkat annerpaartaasa sisamararterutaannik pisarput.

Ilaasortaassutit
Illuanik Aleqa Hammondip ilaasortaanermut pisartakkat qaammammut 45.456 koruunit paariinnassavai, taakku folketingimut ilaasortat tamarmik pisarpaat.

Folketingimut ilaasortatut allaffeqarsinnaatitaavoq - partiimi ilaasortaaguni attaviitsuuguniluunniit. Tassunga tunngatillugu allanngortoqassanngilaq.

Attaviitsunngornerup kingunerisaanik Siumup gruppianut akiliersuinermut naatsorsuutinik Folketingip allattoqarfianut tunniussissaaq, partiip gruppiata piujunnaarnera pissutigalugu.

Siulittaasup tullia
Folketingip Kalaallit Nunaat pillugu ataatsimiititaliaani siulittaasup tulliatut inissisimanera qanoq pineqassanersoq nalunarallarpoq. Ullumikkut partiit talerperlerni inissisimaffeqarpoq.

Folketingip ataatsimiititaliaa ukioq suliffiusumut nutaamut atatillugu nutaanik inuttalersorneqassaaq, taanna oktobarimi aallartissaaq.

Aleqa Hammond pillugu allaaserisat kingulliit atuakkit:

Powered by Labrador CMS