Aleqa: Nunanut Allanut Sillimaniarnermullu Periusissiaq kukkuneqarpoq

Issittup danskit naalakkersuisuinit pingaartinneqarnera Aleqa Hammondimit (NQ) nuannaarutigineqarpoq, taamaattoq saqqummiunneqarsimasunik aaqqiisoqarnissaa kissaatigalugu.

- Issittoq salliutinneqartorujussuaq takullugu assorsuaq pitsaavoq, aammalu danskit naalakkersuisuisa maannakkut Kalaallit Nunaanni piffiit immikkut ittut qitiutinneqarnissaannik kissaateqarneq tusarsimagaat, uagut politikerit kalaallit ukiuni kingullerni taakkartorsimasavut, Aleqa Hammond tusagassiutinut nalunaarummi allappoq.

- Tamatumani pineqarput silaannaap allanngornerata uagutsinnut sunniutai, attanneqarsinnaasumik inuussutissarsiornikkut ineriartortitsineq, annertunerusumik angallannikkut sillimaniarneq aamma Issittumi annertusiartortumik sakkussianik pilersuineq. Periusissiarli sorpassuartigut kukkuneqarpoq, tamatumani qanoq suullu – iliuusissat aningaasallu ilanngullugit – atorlugit danskit naalakkersuisui suliassaqarfinnut pineqartunut atuinissaminnut piareeqqanersut.

- Taamaattumik ministeri akeqqullugu qinnuigaara, danskit naalakkersuisuisa sikumi suliaqarnermi nutaaliaasumik nunalu tamakkerlugu pisussami periusissiami neriorsuutigineqartut pilersinniarnerannut iliorniarnersut kiisalu periusissiami neriorsuutigineqartoq Kunngeqarfiup Issittumi inuusuttunik suleqatigiissutinillu annertunerusumik sammisaqarnissamik suliaqarnissaanut tunngasutigut, ingammik nunap inoqqaavisa akornanni. Neriuutigaara, siunertanut pitsaasunut danskit naalakkersuisui aningaasaliissutit pisariaqartut iliuusissatigullu nukiit tunniutissallugit piareeqqasut, taamaasilluta periusissiami allaqqasut atuutsinneqalernissaat aallartinniassagatsigu.

Aningaasaliinissanut qanoq periusissiaqassanersoq Aleqa Hammondimit paasequsunneqarpoq.