Hot
Aleqa uranimik tuniniaasalerniarpoq
– Siunissami qanittumi Kalaallit Nunaat nunarsuarmi uranimik avammut tuniniaasarnerpaat qulit ilagilissavaat. Taamatut Reykjavikimi oqarpoq Naalakkersuisut siulittaasuat Aleqa Hammond
Uranimut akuersaanngilluinnarnerup atorunnaarsinneqarnissaa suli oqallisaagaluartoq ataatsimeersuarnermi Arctic Circle-mi ataatsimeersuarnermi, sapaatip akunnerata naanerani uani Islandip illoqarfiisa pingaarnersaanni Reykjavikimi ingerlanneqartumi ammaanersiorluni oqalugiarnermini Naalakkersuisut siulittaasuat Aleqa Hammond oqarpoq uranimik tuniniaasalerniarluni.
– Siunissami ungasissorsuunngitsumi Kalaallit Nunaat uranimik annertuumik avammut tuniniaaasartunngussaaq - ilimanarluni nunarsuarmi uranimik avammut tuniniaasarnerpaat qulit immaqaluunniit tallimat akornanniilissalluni. Atomip nukinganik nukissiorfiit periarfissarpiaapput atorneqarsinnaasut, ullumikkut nunarsuarmi silap pissusiata allanngoriartornera akiorsinnaassagutsigu. Tamanna peqatigalugu aamma pingaaruteqarpoq ataatsimoornissarput, Issittumilu misigisavut atorlugit nunarsuup kissatsikkiartornerata kinguneqaataanik oqallinnermi innuttaasut atisuumik akulerutsinnissaannut, Aleqa Hammond oqarpoq erseqqissarlugulu:
– Issittumi nunani inuit qinigaattut ataatsimut akisussaaffigaarput piffissaagallartillugu pisariaqartunik aalajangiinissarput. Kalaallit Nunaat 2009-mi kunngeqarfimmi Danmarkimi namminersulerpoq, tamatumuunalu ilaatigut kalaallit inuiattut akuerineqarput naalagaaffiup innuttanut pisussaaffii naapertorlugit, taamaattumillu Kalaallit Nunaat allanngortinneqarsinnaanngitsumik imminut aalajangiiffigisinnaasoq, Aleqa Hammond oqarpoq erseqqissarlugulu Kalaallit Nunaat namminersornermut inatsit malillugu isumannaatsuunermut illersornissamullu politikkimi nammineq oqartussaassuseqanngitsoq.
Aamma atuaruk: "Arctic Circle aallartippoq"
– Taamaattumik Kalaallit Nunaat ullumikkut immikkuullarissumik imatut inissisimavoq Issittumi nunap inuiini kisiartaalluni nammineq naalakkersuisoqarluni, akuerineqartumik isumaqatigiissutigineqartumillu nammininersulivissinnaatitaalluni. Namminersornermut inatsit malillugu Kalaallit Nunaata oqartussaafeqarfiit amerlanerpaat tigusinnaavai. Kisiannili isumannaatsuunermut illersornissamullu politikki pinnagu, Aleqa Hammond oqarpoq.
Oqalugiaataa tamaat atuarsinnaavat uani
Aleqa Hammondip oqalugiaataa Sermitsiaq.AG-p malitseqartissavaa.