Aleqa: Urani pillugu nalunaarusiaq nutaaq arlaannut attuumassuteqanngilaq

– Pisariaqarpoq erseqqissassallugu uranimut aatsitassanullu allanut radiop qinngorneranik ulorianartulinnut akuersaannginnerup atorunnaarsinnissaanik allanngortinnissaanilluunniit immikkut ilisimasallit nalunaarusiaat attuumassuteqanngitsoq, tassani ilaalluni Lett Advokatfirma-p allakkiaa, tassaasoq Inatsisartunut nalunaarusiaq attuumassuteqanngitsoq, 2012-imi Inatsisartut ataatsimiinnerminni suliassiissutigisimasaat.
– Taamaattumik nalunaarusiaq Lett Advokatfirmallu allakkiaa isigineqarsinnaanngillat Kalaallit Nunaata Danmarkillu akornanni oqaloqatigiinnermi Kalaallit Nunaannut iluaqutissiutaasoq.
Taamatut oqarpoq Naalakkersuisut siulittaasuat Aleqa Hammond, Siumut.
Uranimut aatsitassanullu allanut radiop qinngornerinik ulorianartulinnut akuersaannginnerup atorunnaarsinneqarnissaanik allanngortinneqarnissaanilluunniit immikkut ilisimasallit nalunaarusiaat ´attuumassuteqanngitsoq´ septembarip 12-anni tamanut saqqummiunneqarpoq.
Nalunaarusiap taassuma ilaatut allakkiaq ´uranimut aatsitassanullu allanut radiop qinngorneranik ulorianartulinnut akuersaannginnerup atorunnaarsinneqarnissaanut allanngortinneqarnissaanulluunniit inatsisitigut pissutsit´ ilaavoq Lett Advokatfirmap allassimasaa.
Allakkiaq taanna kingorna Nunatsinni Danmarkimilu tusagassiorfitsigut eqqaaneqarsimavoq, ilaatigut qallunaat nunanut allanut ministeriata Villy Søvndalip Politiken-imi marlunngormat apersorneqarnermini nalunaarusiaq taallugu ´kalaallinut iluaqutissiut´ , Nunatta Danmarkillu isumannaatsuunermut illersornissamullu politikkimi oqaloqatigiinneranni, kalaallit uranimik piiaassappata avammullu tuniniarlugu.
Nunanut allanut ministeri: Akuersaannginneq attatiinnarsiuk
Aatsitassanik piiaanermi uranimut saniatigut tunisassiatut akuersaannginnerup atorunnaarsinneqarnissaa Villy Søvndalip tapersersunngilaa.
Tamanna paasinarsivoq ataasinngormat Nuummut tikeraapallannerani, tassani pingaartumik Aleqa Hammond ataatsimeeqatigimmagu.
– Siunissami uranimik piiaasoqassappat tamassuma isumannaatsuunikkut illersornissakkullu kinguneqaatissat Kalaallit Nunaata Danmarkillu qanimut oqaloqatigiissutigaat. Suleqatigiinnermut sinaakkutassat oqaloqatigiissutigisimavagut, isumaqatigiissutigaarpullu ataatsimut aaqqiissutissarsiussalluta, Inatsisartut tunngaviusumik aalajangiissappata akuersaannginnerup atorunnaarsinneqarnissaanik, Villy Søvndal ilaatigut oqarpoq.