Aleqa Trumpimut: Amerikarmiut Nunatsinni sakkutooqarfeqarnerminnut akiliuteqartalerlik
Donald Trumpip Kalaallit Nunaannik pisiniarluni oqariartuuteqarnera Aleqa Hammondimit paasiuminaatsinneqarpoq: - Oqariartuutaa ullutsinnut naleqqutinngilaq, oqarpoq
- Amerikarmiut Nunatsinnik pisinatik sakkutooqarfeqarnermut akiliuteqartalerniarlik, tamanna inuiaqatigiinnut pitsaanerussaaq.
USA-mi præsidentip Donald Trumpip Kalaallit Nunaata pisiarineqarnissaanik isumaliuteqareersoq Inatsisartuni ilaasortaq Aleqa Hammond Sermitsiaq.AG-mut oqarpoq. Kalaallit Nunaat tuniniagaanngitsoq Aleqa Hammondip naqissuserpaa.
Kalaallit Nunaat nunanit tamalaanit soqutigineqarluarnera erseqqissoq nutaarsiassap takutikkaa oqarpoq.
Ataqqinanngitsuliorneq
- Kalaallit Nunaata inissisimanera pissutaalluni USA-p pisariaqartippaatigut. USA-p Nunatsinni aningaasaliiniarnera ersarilluinnarpoq. Oqariartornerali ammut isiginnilluni oqariartorneruvoq, oqaannartoqarsinnaanngilarmi nunamik piserusuttoqarluni, Aleqa Hammond oqarpoq.
Donald Trump Danmarkiliaruni ataqqinninnerulaarnissaa neriuutigaa.
- Donald Trumpip oqaatigisai ullutsinnut naleqqutinngilluinnarput - Danmarkimi naapeqatigiittoqalernerani tamanna allanngussasoq neriuutigiinnarneqarsinnaavoq, Nunatta Qitornaanit Aleqa Hammond oqarpoq.