naalakkersuisunngortoq
Aleqa: Taamaammat Demokraatit soraarsitaapput
Demokraatit naalakkersuisooqatigiinnut isornartorsiuisarnerat taaseqatigiittarnermik Siumumik suleqateqarnerup kipitinneqarneranut pissutaavoq
Siumup Demokraatinik taaseqatigiittarnermut suleqateqarneq ataasinngornermi kipitippaa. Suleqatigiinneq novemberimi siorna aallartittoq Demokraatit ataatsimiititaliani pingaarutilinni inissaqalernerannik kinguneqarisimagaluarpoq inissallu taakku maanna annaaneqarput. Demokraatit isornartorsiuisarnerat pissutigalugu suleqatigiinneq Naalakkersuisut siulittaasuata Aleqa Hammondip kipitippaa.
Atuaruk: Siumup tatiginannginneq takuteqqippaa
Demokraatit siulittaasuat Jens B. Frederiksen isumaqarpoq Siumut uppernassutsimigut ajornartorsiuteqartoq. Taassuma innersuussutigaa taaseqatigiittarnissamik isumaqatigiissut qinigaaffiup sinneranut atuuttussatut isumaqatigiissutaasimagaluarmat.
Atuaruk: Siumup Demokraatit suleqatigiunnaarpaat
- Siumup inatsisartuutitaasa tamarmiusut aamma Atassutip inatsisartuutitaasa tamarmiusut kissaatigisimavaat Demokraatinik suleqateqarnerup taamaatinneqarnissaa, Aleqa Hammond Sermitsiaq.AG-mut nassuiaavoq.
Inussiarnisaarneq
Demokraatit Siumumik suleqateqarneq novemberimi aallartimmat erseqqissaatigaat naalakkersuisooqatigiinnut ilanngunnatik aammalu pisariaqarfiatigut naalakkersuisooqatigiit isornartorsiortarumaarlugit.
- Naalakkersuisooqatigiit inussiarnisaarnikkut Demokraatinik suleqateqarusunnerat utimut Demokraatit naalakkersuisooqatigiinnut iliuuserisagaat iluarineqanngimmat ataatsimoortumik taamatut inassutigineqarpoq. Inunnut ataasiakkaanut tunngassuteqanngilaq aamma pisariaqarfiani ataatsimiititaliani suleqatigiissimavugut, kisianni oqariartuutigineqartartut ilaat suleqatiginninngippalaartut maluginiarneqarsimapput, Aleqa Hammond oqarpoq.