Arctic Encounter
Aleqa: Silap pissusiata allanngoriartornera ineriartornermut iluaqutaasinnaavoq
Siumup folketingimut ilaasortaatitaa, Aleqa Hammond, uani sapaatip akunnerata naanerani Parisimi silaannaap allanngornera pillugu ataatsimeersuartoqarneranut atatillugu aaqqissuussami Arctic Encounterimi peqataavoq
Kalaallit Nunaata namminersorluni oqartussaanini tunngavigalugu, inuussutissarsiornikkut ineriartornissamut, soorlu aalisarnikkut, takornariaqarnikkut, aatsitassarsiornikkut nunalerinikkullu pisinnaatitaaffeqarpoq. Inuussutissarsiutit taakkua tassaassapput siunissami aningaasaqarnikkut toqqammaviusussat.
Folketingimi ilaasortaq Aleqa Hammond (S), Arctic Encounterimi ilaatigut oqalugiarnermini taama oqarpoq.
Taanna pingaarnertut oqalugiaqataasutut peqataavoq.
Isumaqatiginninniarnernut peqataarusuttoq
- Issittumi najugaqartuusugut avaqqulluta aalajangiisoqartarpoq, soorlu Issittumi Siunnersuisooqatigiinni, EU-mi, arfanniarneq pillugu ataatsimiititaliarsuarmi, silaannaallu allanngornera pillugu ataatsimeersuarnerni. Uffa uagut silaannaap allanngornerata kingunerisaanik toqqaannartumik eqqorneqartugut.
- Issittumi ineriartornermut isiginnaaginnartutut inissisimajunnaarnissarput piffissanngorpoq. Nunarput issittup tallimararterutigaa, taamaattumik issittumi politikki pillugu isumaqatigiinniarnerni ilusilersuinernilu pinngitsooratanerrivinni issiaqataasassaagut, Siumumi politikeri oqalugiarnermini oqarpoq.
Taassuma oqaatigaa silap pissusiata allanngornerata kingunerisaanik ajornartorsiutit pilersut akiorniarneqarnerini Kalaallit Nunaata akisussaaqataasutut peqataanini ingerlatiinnassagaa, allanngoriartornermili aamma nunarput periarfissanik nutaanik takunnissinnaasoq. Aalisakkat takornartat, nunalerinermi sivisunerusumik naatitsisinnaalerneq, takornariaqarneq, aatsitassarsiornermi misissueqqaarnissamut periarfissat pitsaanerusut,tassaapput nunatta ilaatigut immikkut suliniuteqarfigisai.
Atuaruk: Aleqa: Partiit isumaqatigiissuteqartut naalagaaffeqatigiinneq qajassuutinngilaat
Nammineq pilersorneq
Aleqa Hammondip aamma immikkut eqqaavai avataani aalajangiinerit qanoq nunatta innuttaasuinut ajoqutaasinnaatigineri, soorlu EU-p puisinik eqqusseqqusiunnaarnera piniartut ilaasa aningaasaqarneranik aserusisimasoq.
Taamaattumik isumaqarpoq, nunarput inuussutissarsiornikkut tamatigoortumik toqqammavigissaartumillu siunissamut aqqutissiuussisariaqartoq.
- Nunatta nukissamik atuinerata 75 procentia erngup nukinga atorlugu nukissiornermitpinngortuuvoq. Tunaartaassaaq suli annertunerusumik imminut pilersornissaq, mingutsitsinngitsumillu nukissiornermik politikki selskabinut avataaneersunut kajuminnartuussaaq. Kalaallit Nunaat imminut nalligissanngilaq, taanna erseqqissaavoq.
Isumaqarporlu silap pissusiata allanngornerata niuernikkut periarfissat nutaat aamma nassatarigai, aningaasaliisartunut aamma soqutiginartuusut.
- Sinerissatsinni sikup annikilliartornerata aatsitassarsiorneq ajornannginnerulersissavaa. Silaannaap allanngornera issittumi aningaasarsiornikkut ineriartornermik kinguneqassaaq, tamassumalu nunarput nunarsuarmi pingaaruteqarluinnartumik inississavaa, Aleqa Hammon oqarpoq.