Skip to main content

Aleqa politiinik paarsisoqassaaq

Politiit pinarsinnaasunik takusaqarumanngillat, Siumup folketingimut qinigassanngortitaa akerleriissutaasoq ullumi qinersisartunik ataatsimiititsinermi peqataalerpat

– Paasisimavara akerliussutsimik takutitsisoqassamaartoq, politiillu paarissallunga piareersimasut.

Taamatut facebook-imi quppernermini allappoq Siumup folketingimut qinigassanngortitaa Aleqa Hammond, Nuummi kulturip illorsuani Katuami toqqaannartumik aallakaatinneqartumik qinersisartunik ataatsimiititsinermi peqataanissaminut atatillugu.

Qaqutigoortuuvoq politikerit tamanut ammasumik aaqqissuussinermi politiinit paarineqartarnerat. Aleqa Hammondilli tamanna misilereersimaavaa. DTamanna pivoq ukiakkut ataatsimiinnerup ammarneqarnerani Nuummi akerliussutsimik takutitsinersuaqarmat. Taamanikkut akerliussutsimik takutitsinermi pingaartumik pineqarpoq naalakkersuisut siulittaasorisimasaat, paasineqarmat taassuma Namminersorlutik Oqartussat atorfikkaat ikiortigalugit landskarsi nammineq kassekredit-imisut atortarsimagaa, ilaatigut ilaquttanilu inuinnartut angalasarnerni. Ajortuliorneq tamanna Inatsisartut kukkunersiuinermut ataatsimiititaliaata arlaleriarluni isornartorsiortarsimavaa, tamannalu qinersinermik kinguneqarpoq.

Taamaattumik amerlasuut tupaallaqaat Siumup siulersuisuunerisa qanittukkut Aleqa Hammond folketingimut qinigassanngortimmassuk. Aamma tamanna partiip iluani assortuussutaasimavoq. Aviisip Sermitsiap sapaatip akunnerani saqqummersup oqaluttuaraa Kim Kielsen tamatumunnga akerliulluni sorsussimasoq, Siumullu siulittaasuata tulliata Jørgen Wæver Johansenip Aleqa Hammondip qinigassanngortinnissaa tapersersorsimagaa. Politikkikkut akerleriissuteqarneq,  Siumup qullersaanni tupaallannartumik isumaqatigiinngittoqarneranik takutitsisoq, tamannalu qineqqusaarnermut malunnaateqarlualersimavoq.

Taamaasilluni sapaatip akunnerani uani siusinnerusukkut akerliusut sisamat, Giiti Tittussen siuttoralugu, Aleqa Hammond, IA-p siulittaasorisimasaa Kuupik Kleist, aamma Atassummeersoq Steen Lynge poltiiinut suliassanngortippaat, landskarsip aningaasaataanik atornerluisimasutut.

– Innuttaasutut qinigatta suleriaasiat sivisuumik naammaginngissimavara. Iluamilli iliuuseqarfigisimanagu. Eqqarsartarsimavunga "Qanoq iliuuseqarsinnaavunga?" Maanna paasisimavara ilumut iliuuseqarsinnaalluta. Toqqorlunga isiginnaaginnartuunera qatsuppara. Qinikkammi tamarmik nunarput kalaallillu tamaasa sullittariaqaraluarpaat, Giiti Tittussen politiinut suliassanngortitsinini pillugu facebook-imi quppernermini allappoq. Tassani aamma akerliussutsimik takutitsiniarneq, Aleqa Hammondip oqaatigisaa, apeqqutigaa. Tupinnaraluartumik taanna tusarsimanngilaa.

Politiinut unnerluutigineqarsimagaluarluni, akerliussutsimillu takutitsivigineqarsinnaagaluarluni, politiimillu paarsisoqartussaalluni Aleqa Hammond qinersisartunik ataatsimiititsinissamut piareersimavoq.

– Folketingimut qinigassanngortittorpassuit allat naligalugit Folketingimut qinigassanngortippunga, qinigassanngortinnissamullu piumasaqaatit naammassisimavakka. Pisortanut akiligassaqanngilanga. Akisussaaffigalugu akuerisimavara, inuttullu pilliuteqarsimaqalunga, Aleqa Hammond facebook-imi quppernermini allappoq.

Katuap paarlersuani qinersisartunik ataatsimiititsineq, tassani partiit tamarmik marlunnik peqataatitaqassallutik, kalaallisut nal. 14 qallunaatullu nal. 16 ingerlanneqassaaq.

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER