Aleqa: Oqaatsikka aalajangiusimavakka

Siumup folketingimut ilaasortaatitaata Aleqa Hammondip aalajangiusimavaa kalaallit Danmarkimi pitsaanerusumik tikilluaqquneqartarnissaannik akulerutsinneqartarnissaannillu Folketingimi tusarniaasoqarnissaa nammineq suliniutigisimallugu.

Tusagassiorfinnut nalunaarut

Nalunaarut tamanna siullermik Aleqa Hammondip arfininngormat nammineq tusagassiorfinnut nalunaarutigaa.

Kingornali saqqummerpoq Inuit Ataqatigiit folketingimut ilaasortaatitaata Aaja Chemnitz Larsenip suliassaq tamanna Folketingip Kalaallit Nunaannut Ataatsimiititaliaani novembarip 20-anni ataatsimiinnermi saqqummiussimagaa.

Aalajangiusimavaa

Taamaakkaluartoq Siumut tunuliaqutaralugu folketingimut ilaasortap aalajangiusimavaa tusarniaanissaq nammineq isumassarsiaralugu.

– Oqaatsikka aalajangiusimavakka. Tusarniaanissamik siunnersuut siusissorujussuakkut saqqummerpoq. Tamanna pivoq SFI-p kiisalu Institut for Menneskerettighederip kalaallit Danmarkimiittut qallunaat oqartussaasuinit immikkoortinneqartarnerannik nalunaarusiaasa saqqummiunneqarnerisa kinguninngua. Aaja allaanerusumik siunnersuuteqarpoq, tassa kalaallit nunaannut ataatsimiititaliaq nalunaarusianik amerlanerusunik inniminniissasoq. Tusarniaanissarli uanga siunnersuutigisimavara, tassuuna qulaajarneqassalluni ministereqarfimmut atatillugu uagut ataatsimiititaliami suliniutit suut ingerlassinnaanerivut, Aleqa Hammond Sermitsiamut mailikkut allappoq.

Ataatsimiinnerit arfinillit

Juunip 18-ianni qinersinerup kingorna Kalaallit Nunaannut Ataatsimiititaliap arfinileriarluni ataatsimiittarnerani oqaluuserisassat allattorsimaffiat Sermitsiap misissorsimavaa. Tassani Aaja Chemnitz Larsen tusarniaanissamik siunnersuisutut kisimi allassimavoq. Sermisiap Aleqa Hammond qinnuigaa tusarniaanermut suliniutaa pillugu Folketingip allagaataanik innersuussuteqaqqullugu. Tassani innersuussutigiinnarpaa ataatsimiititaliap pappialaatai tamanit pissarsiarineqarsinnaasut.

Taarsiullugu Aleqa Hammondip Facebookimi quppernernimik Sermitsiaq inuttarsiuinnartutut oqaatigaa.