Aleqa inatsimmik unioqqutitsisimaneq pillugu ilisimatinneqarusuttoq
Kalaallit Nunaanni innuttaasut anngiortumik naalaarneqartarsimappat imaluunniit akuerisaanngitsumik paasissutissaataannik aallertoqartarsimava, taamatut aperivoq Nunanut Allanut Sillimaniarnermullu Ataatsimiititaliami siulittaasoq.
Isertortumik paasiniaasarnermik Nakkutilliisut Sakkutuut isertortumik paasiniaasartuinik isornartorsiuingaatsiarnerat Danmarkimi tupaallaatigineqarsimavoq.
Isertortumik paasiniaasartut ilaatigut inatsit unioqqutillugu suliaqartarsimasutut aamma Danmarkip naalagaaffiani innuttaasut pillugit paasissutissanik tunngavissaqanngitsumik pissarsisarsimasutut pasillerneqarput.
Isertortumik paasiniaasartut pisortaat aqutsisusutllu sulisut marluk tassunga atatillugu suiunnaarsinneqarsimapput.
Nunanut Allanut Sillimaniarnermullu Ataatsimiititaliami siulittaasup Aleqa Hammondip (NQ) maanna paaserusuppaa, Kalaallit Nunaanni innuttaasut pisimasumut ilanngunneqarsimanersut.
Ilisimatitsissuteqarneq naammanngittoq
Naalakkersuisunut arlalinnik apeqquteqarnerminiut ilaatigut apeqqutigaa, Kalaallit Nunaat kalaallillu pillugit paasissutissanik anngiortumi pissarsisoqarsimanersoq taakkunanngalu ingerlatitseqqiisoqarsimanersoq.
Politikerip ilanngullugu paaserusuppaa, Inatsisartut qanoq periarfissaqanersut, Isertortumik paasiniaasartut Nakkutigineqarnerat pillugu paasissutissinneqarnissamut.
- Nunatta Qitornaanit naammagineqanngilaq Isertortumik paasiniaasartut nakkutigineqarnerannut tunngatillugu taamaallaat ilisimatinneqartarneq, taamaammat Kalaallit Nunaat peqataatinneqartariaqarpoq nunamut, innuttaasunut suliffeqarfinnullu tunngatillugit suliaqartoqarnerani, Aleqa Hammond apeqqutiminut tunngaviusut pillugit allappoq.