Skip to main content

Aleqa IA-mut isornartorsiuereersoq: Qulaajaasoqarnissaa uagut aamma kissaatigaarput

Aleqa Hammond illuatungiliuttunut isornartorsiuivoq. Illuatungiliuttut misissuisoqannginnissaa anguniaraat Aleqa isornartorsiuivoq, misissuisoqarnissaali IA-mit aamma kissaatigineqarpoq

Aleqa Hammond Siumumi aamma Naalakkersuisuni siulittaasuujunnaareeraluartoq Inuit Ataqatigiillu suli isumaqatigiinngissuteqarput.

Kukkunersiuinerup unitsinneqarnissaa illuatungiliuttunit kissaatigineqartoq Aleqa Hammondip Qanoruumut pingasunngornermi oqaatigaa.

- Naalakkersuisooqatigiinni aammalu partiit illuatungiliuttut arlaannaataluunniit Kukkunersiuinermut ataatsimiititaliap sulinerata inernera takorusunngilaat. Allaanngilaq ersissutigigaat takussallugu. Uanga isumaqarpunga Siumup nukittunermini takutikkaa, Aleqa Hammond Kukkunersiuinermut ataatsimiititaliap misissuinerata ingerlaqqiinnarnissaanut kissaateqarnini oqaatigaa. 

Inuit Ataqatigiit sinnerlugit Kukkunersiuinermut Ataatsimiititaliami ilaasortaasup Juliane Henningsenip tamanna eqqortuunngitsoq oqaatigaa.

Qulaajaasoqarnissaa aamma kissaatigaat
- Suna tamarmi saqqummertariaqarpoq, Juliane Henningsen akissuteqarpoq. 

- Inuit Ataqatigiinnit misissuinissaq tikilluaqqungaarparput, kissaatigaarpullu suut tamarmik saqqummiunneqassasut. Naalakkersuisut Siulittaasorisimasaat maannakkut ilisimasaqarsimaguni, isumaqarpugut pisussaaffigigaa inuiaqatigiinnut saqqummiutissallugu, tusagassiutinut nalunaarummi Juliane Henningsen allappoq, nangillunilu:

- Qularutigineqassanngilluinnarpoq Inuit Ataqatigiinniit akuersaannginnatsigu, nunatta aningaasaataasa unioqqutitsisumik atorneqarneri,  Aleqa Hammond-imut pitsaaneruinnassaaq akisussaaffimmik tigusilluni partiinik inunnillu allanik pasinarsaanini qimallugu ilisimasaqarsimaguni saqqummiuttuuppagit.

Misissuineq unitsinneqartoq?
Naalakkersuisut aningaasanik atuisimanerannik misissuineq unitsinneqarallarpoq Inatsisartunut qinersisoqarnissaanik suaaruteqartoqarnera pissutaalluni, JyllandsPosten allappoq. 

Kukkunersiuinermut ataatsimiititaliamit piumasarineqaraluarpoq qulaajarneqarsinnaasut tamarmik qulaajarneqassasut. Naalakkersuisut siulittaasorisimasaat Aleqa Hammondip nunatta karsianit aningaasanik 100.000 koruunit qaangerlugit namminerminut atuisimanera pissutaalluni ataatsimiititaliamit taama piumasaqartoqarpoq. 

- Qinersisoqarnissaanik suaaruteqartoqarnera iluatigalugu suliarineqartut tamarmik unitsinneqarput. Ataatsimiititaliani sulinerit unitsinneqarput, pisattatsinnik poortuileruttorpugut angerlarnissatsinnullu piareersarluta, Kukkunersiuinermut Ataatsimiititaliami siulittaasup tullia Anders Olsen Siumut, JyllandsPostenimut oqarpoq. 

Ingerlateqqinneqassanersoq ilisimaneqanngilaq
Inatsisartunut qinersisoqareerpat aningaasanik atornerluisoqarsimanera ingerlateqqinneqassanersoq suli ilisimaneqanngilaq. 

Siumumit, Atassummit aamma Inuit Ataqatigiinnit piumasarineqarpoq qulaajaaneq naammassineqartariaqartoq danskit aviisiat allappoq. 

Misissuineq oktobarip 23-ani naammassineqarsimasussaagaluarpoq. 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER