Aleqa Hammondimut tatiginnikkunnaarniarneq itigartippaat

Aleqa Hammondimik Siumumeersumik tatiginnikkunnaarnissamik taasinissamik siunnersuut

Naalakkersuisooqatigiit Siumut aamma Atassut kiisalu attaviitsoq Hans Enoksen tatiginnikkunnaarnissanik siunnersuummik itigartitsipput. Naalakkersuisut siulittaasuat Aleqa Hammond Siumumeersoq isumaqarpoq siorna qinersinermi qinersisartut ersarilluartumik pisinnaatitsissummik tunniussaqartut. Tatiginnikkunnaarnissaq itigartinnissaanut siunnersuut 17-it akueraat 13-it akerliusut.

Tatiginnikkunnaarnermik taasinissamik siunnersuut Inuit Ataqatigiit saqqummiussaat naalakkersuisooqatigiit itigartippaat.

- Inuit Ataqatigiit siunnersuuteqarnermikkut akisussaassuseqanngitsumik iliorput demokratiimullu ataqqinnigatik, Siumut sinnerlugu oqaaseqartoq Jens Immanuelsen oqarpoq.

Taassumali oqaaserisai attaviitsup Hans Enoksenip illuatungilerpai.

- Ikinnerussuteqartut oqaasii aamma ataqqisassaapput tamanna aamma Siumukkunnut atuuppoq, Hans Enoksen oqarpoq.

Naalakkersuisooqatigiit taperserlugit Hans Enoksen taasivoq, Partii Inuillu inatsisartuni ilaasortaatitaat Randi Broberg taaseqataanngilaq.

- Partiit angisuut pissaaneqarniunnerat peqataaffiginiannginnatsigu taama aalajangerpugut, Randi Broberg oqarpoq.