Aleqa Hammond qinigassanngortittumik toqqaanianngilaq
Aleqa Hammond (NQ) Folketingimut qinigaaqqissagaluaruni, aalajangersimasumik ministeriunermik toqqaanissani kissaatiginngilaa. Tamatumunnga taarsiullugu Aleqa Hammondip kissaatigaa, danskit naalakkersuisooqatigiit Kalaallit Nunaata pitsaanerpaamik iluaqutigisinnaasai isumaqatigiissuteqarfigerusuppai.
Aleqa Hammondip (NQ) Folketingimut qinersinissaq sioqqullugu ersarissumik ilisimatitsissutigissallugu kissaatigaa, Nunatta Qitornai pituttorsimanngilaq ministeriunissatullu qinigassanngortittoq qinersisartunut kalaallinut pitsaanerpaamik neqerooruteqarniartoq tapersersussallugu.
- Nuannaarutigalugu maluginiarsimavara, Folketingimi ilaasortaaqatimma arlallit Kalaallit Nunaanneersut Savalimmiuneersullu qinigaaffimmi matumani iliorsimanittut, maanna periusima assinga toqqaraat. Tassalu, danskit naalakkersuisunngortussat nunaminnut iluaqutaanerpaamik aammalu qinersisartunut annerpaamik utertitsisinnaasut isumaqatigiissuteqarfigissagaat. Taamaasillunga qulanngiivippunga, Venstremik isumaqatigiissutiga qinigaassimmi matumani naalakkersuisunik uppititsinnginnissaq Kalaallit Nunaannut iluaqutaanerungaarsimasoq, siusinnerusukkut Socialdemokratinik illuatungiliuttutut inissisimasimaninniit, Aleqa Hammond tusagassiuutinut nalunaarummi taama oqarpoq.
Venstrep isumaqatigiissuteqarfigineqarnerata Kalaallit Nunaata Kalaallit Nunaat pillugu ataatsimiititaliami siulittaasuuffeqaleqqinnera qulakkeersimagaa, taassuma oqaatigaa.
Pitsaanersusumik isumaqatiginninniarneq
Venstremik isumaqatigiissuteqarneq Kalaallit Nunaata Danmarkillu akornanni pitsaanerusumik suleqatigiinnikkut isumaqatigiinniarnikkullu silaannarmik pitsaanerusumik tunngaviliisimavoq, Aleqa Hammond isumaqarpoq, oqarporlu:
- Partiip naalakkersuisuutitaqartup Kalaallit Nunaata Folketingip Kalaallit Nunaannut Ataatsimiititaliaani siulittaasuuffik danskit blokkiisa marluk akornanni isumaqatigiinniarnermi annaaneqarsimagaluartoq kisimi qulakkeerneqanngilaq. Aammattaaq danskit naalakkersuisuisa allatorluinnaq kalaallit Folketingimi ilaasortaatitai kalaallillu Naalakkersuisui illersornissakkut, inatsisinik atuutsitsinermi sakkutuullu eqqagassaataannik qangarnisanik saliinissaut aningaasanik toqqissisimasumik suleqatigineqarsinnaasimapput. Soorluttaaq aamma assinganik danskit naalakkersuisui Nunatsinnilu Naalakkersuisut siunissami inuussutissarsiornermi suleqatigiinnissami aamma mittarfiit aningaasalersornissaannut kiisalu nunani allani akikinnerusumik aningaasanik taarsigassarsiniarsinnaanissamut ikorfartuisimasut, taanna oqarpoq.
Aleqa Hammond Folketingimut qinigaaqqissagaluaruni, partiit akimorlugit isumaqatigiinniartarnerni misilittakkani pitsaasut nanginnissai kissaatigaa, tusagassiuutinut nalunaarummi tamanna naqissuserneqarpoq.