Folketingi

Aleqa Hammond: Peqquserlunniarsarinngilanga

Aleqa Hammond, maanna attaviitsunngortoq, kreditkortimik atornerluinermut suliaq ajuusaarutigaa

Aleqa Hammond

- Peqquserlunnissara siunertarinngilluinnarpara. Suliaq uannut Siumumullu pitsaasuunngilaq.

Partiip marlunngornermi ilaasortaajunnaartitsinerata kingorna, Folketingimut ilaasortaq, Aleqa Hammond, DR-imut taama oqarpoq.

Atornerluineq
Kreditkortimik immikkut ittumik 12.900 koruunit nalinginut atornerluineq tamatumunnga pissutaavoq, taanna folketingimut ilaasortat ataatsimiinnerminnut atatillugu timmisartornernut taxanullu atorsinnaavaat.

Aleqa Hammond Nuummi imminut taanna pisiniutigisimavaa - maannalu aningaasat utertittariaqalerpai.

Appassaa
Taanna aningaasanik tukkattumik sulianut tunngasumik aappassaa tusagassiuutitigut eqqartorneqangaatsiarpoq.

Aningaasat nunatta karsianeersut 106.363,27 koruunit nammineq atorsimagai paasineqarmat, Aleqa Hammond 2014-imi Naalakkersuisut siulittaasuattut tunuartariaqarnikuuvoq. Aningaasat angalanernut ilaatigut atorneqarput.

Utoqqatsertoq
- Una suliaq (kreditkortimut tunngasoq, aaqq.) maluginiarneqarluarsimasoq isumaqarpunga, soorunami partiimut taamatut saqqummernera ajuusaarutiginerarpara. Paasisinnaavaaralu partiip tapersersinnaanngikkaanga, kisianni politikkikkut sulineq ingerlaqqippoq, Aleqa Hammond oqarpoq, taanna attaviitsutut Folketingimi ingerlaqqippoq.

- Siumumi ulluinnarni aqutsisut Folketingimit nammineq tunuarnissara kaammattuutigaat, sinniisorlu nangitsisillugu, imaluunniit taamaaliunngikkuma partiip tunuliaqqutsiinini taamaatissavaa, taanna Ritzauimut oqarpoq.

Attaviitsoq
- Suliat upperisakkat aallunniarlugit neriorsuinikuuvunga, tapersersorneqarluarlungalu qinigaanikuullunga. Ingerlaqqiinnarniarlunga aalajangerpunga, taamaammat nammineq attaviitsunngornissara qinerpara. Siumut qimassallugu nammineq aalajangerpara, ilanngullugu oqarpoq.

Aleqa Hammondip nammineq nassuiarpaa, Folketingip kreditkortia ajornartoornermi atorsimallugu, nammineq kortini matoqqanerat pissutigalugu.

Najukkami pisiniarnerit
Akiliut Nuummi Starkimi aamma Brugsenimi atorneqarsimasoq aningaasanut atukkanut takussutissiat takutitsinerata kingorna taama nassuiaateqarpoq.

Folketingip akiliutaa, politikerit sulinerminni assersuutigalugu timmisartumut bilitsinut imaluunniit taxanut atorneqarsinnaavoq.

Folketingip allattoqarfiata ataasinngormat ataatsimeereernermi oqaluttuaraa, Aleqa Hammondip akissarsiaanit aningaasat ilanngaatiginiarlugit.

Suliaq naammassisoq
- Soorunami iliuutsikka kinguneqarsimapput, aammalu Siumut pisumut ilanngunenqarnera paasilluinnarpara.

- Kisianni allattoqarfillu suliaq suliarereerparput, naammassisutullu isigaara, Aleqa Hammond oqarpoq.

Kingumut qiviaraanni Aleqa Hammondip pisoq naammagisimaanngilaa.

- Pisut allatut pitsaanerusumik iliuuseqarfigisimasinnaagaluarpakka. Ajuusaarutigaaralu inuppassuit ajornartorsiortikkakkit.

- Akisussaaffik tamaat tiguara, kisianni Folketingimi sulinera nangissavara, taanna oqarpoq.

/ritzau/ aamma aaqqissuisoqarfik

Powered by Labrador CMS