Aleqa Hammond Nersornaammik kuultimik nersornaaserneqarpoq

2013-imi juunip 20-anni Uummannap illoqarfittut tunngavilerneqarnerminit ukiunik 250-inngortorsiorneranut atatillugu Inatsisartut siulittaasuata Lars-Emil Johansenip Naalakkersuisut siulittaasuat Aleqa Hammond Nersornaammik kuultimik nersornaaserpaa. Tamanna pivoq ippassaq arfininngornermi juulip 20-anni Uummannami nalliuttorsiorpaluttumik katerisimaarnermi.
Inatsisartut Siulittaasoqarfiata nersornaasiineq tunngavilerpaa maanna sivisuumik Naalakkersuisunut siulittaasuusimaneranik aammalu annertuumik nersortarialimmillu Kalaallit Nunaannik sullissisimammat.
Lars-Emil Johansen, Inatsisartut siulittaasuast, Aleqa Hammondimut oqalugiarnermini ilaatigut oqarpoq:
– Arnaavutit naleqquteruttortoq inuusuttorlu, angusaqareersimaqaatilli assigiinngitsorpassuarnillu. Ilimmarfimmut aningaasanik katersuiniarsimavutit, takornarianut ilisimasortaasarsimavutit nuannarineqartoq, ICC-mi sulisimavutit aammalu Nunatsinni nunanilu allani najugaqarsimallutit.
– Inatsisartunut siullermik qinigaavutit 2005-imi, taamanikkut ilaqutariinnut inatsiseqarnermullu Naalakkersuisunngorlutit, 2007-miillu Aningaasaqarnermut Nunanullu allanut Tunngasunut Naalakkersuisuusimallutit. Aamma partiimi Siumumi arnani siullersaallutit siulittaasuuvutit, soorluttaaq taaneqartariaqartoq 2009-mi partiimi Siumumi siulittaasunngorsimagavit.
– Kalaallit Nunaata namminersulivinnissaanik tunniusimasumik suliniuteqarnikkut ilisimavatsigit, pissutsillu annertuumik allanngortinniarnerannut ilukkut nukittussuseqarputit. Sulineq tamanna pingaartippat assigiinngissutit naligiinnerulersinniarlugit, Nunatsinnilu innuttaasunut tamanut nalinginnaasumik sullissinerup pitsaassusia anguniarlugu. Inunnut attuumassuteqartorujussuuvutit inuuvutillu ammasoq inuunermillu nuannarisalik, qiimasuugavillu innuttaasut nalinginnaasut sukkasuumik attaveqarfigilertarpatit. Aamma malinnaanerit pingaaruteqarpoq paasillugillu nunap immikkoortuini ataasiakkaani innuttaaqatigiit ataasiakkaat unammilligassaat.
Iganermik piginnaasaqarputit ilaquttallu peqatiginerat nuannarilluartuullugu, Lars-Emil Johansen oqalugiarnermini oqarpoq.