naligiissitaaneq
Aleqa: Aappariit suiaaqatigiinngitsut suiaaqatigiillu assigiinngisinneqarput
Ukiakkut ataatsimiinnermi anguniarneqarpoq aappariit suiaaqatigiit qitornarsiartaarsinnaalernissaat
Naalakkersuisut malillugit aappariit suiaaqatigiit suiaaqatigiinngitsullu peqqinnissaqarfimmi sullinneqarnikkut assigiissumik pineqartartut.
Taamatut akissuteqarluni oqarpoq Naalakkersuisut siulittaasuat Aleqa Hammond, Siumut, Naaja Nathanielsen-imut, Inuit Ataqatigiit. Taassuma paragraf 37 naapertorlugu apeqqummigut paaserusussimavaa pisortanit ikiorserneqarsinnaanermut atatillugu inatsisikkut tamakku naligiissinneqarnersut.
Aamma isumaginninnermut inatsiisikkut naligiissinneqarput, ilanngullugit qitornartaarnermi sulinngiffeqarallarneq, utoqqalinersiat siusinaartumillu utoqqalinersiat, Aleqa Hammond allappoq, malugeqquvaalu Kalaallit Nunaanni ilaqutariinnut inatsisini qallunaat nunaanni malittarisassat atorneqarmata.
– Pingaartumik oqaluffimmi katinnermi qitornavissiartaarnermilu. Suiaaqatigiinnillu katitsinerit eqqarsaatigalugit naatsorsuutigaarput ukiaru Inatsisartut ataatsimiinneranni aalajangiivigisassatut siunnersuummik saqqummiussissasugut. Tamanna tunuliaqutaralugu aappariit suiaaqatigiit suiaaqatigiinngitsullu katissinnaanermut naligiisinneqarnissaanik sivisuumik kissaatigineqarsimasoq anguneqassaaq, Aleqa Hammond akivoq.
Taassuma oqaatigaa allannguutissanut, ukiakkut ataatsmiinnermi oqaluuserineqartussatut naatsorsuutigineqartunut, atatillugu suiaaqatigiit qitornarsiavittaarsinnaanermut malittarisassat Nunatsinni atuutsinneqalissanngitsut.
– Arajutsisimanngilarput tamatumani aappariinnik suiaaqatigiinnik assigiinngisitsisoqartoq, naatsorsuutigaarpullu malittarisassat tamakk piaarnerpaamik Nunatsinni atuutsinneqalissasut, Aleqa Hammond akivoq.