samarbejde
Aleqa aamma Kaj Leo qaninnerusumik suleqatigiinniarput
Naalagaaffeqatigiit ataatsimiinnissaat sioqqullugu Naalakkersuisut siulittaasuat savalimmiunilu naalakkersuisut siulittaasuat naapeqatigiissapput ataatsimut saqqummiussassatik piareersarniarlugit
Naalagaaffeqatigiinni nunat namminersorfiusut ukiumoortumik ministeriunermik naalagaaffeqatigiinni ataatsimeeqateqannginnerminni naapittarnissaminnut pisariaqartitsipput. Taamaattumik Naalakkersuisut siulittaasuat Aleqa Hammond, Siumut, aamma savalimmiuni naalakkersuisut siulittaasuat Kaj Leo Johannesen, Sambandspartiet, isumaqatigiipput naalagaaffeqatigiinni ministeriunermik ataatsimeeqateqarnissaq sioqqullugu ataatsimut saqqummiussassiorniarlutik.
– Ukiut tamaasa naapittassaagut, politikkikkut allaffissornikkullu. Ataatsimiinnermilu naalagaaffeqatigiinni ataatsimiinnissaq piareersartassavarput, Aleqa Hammond ukioq qaangiutilersoq kingumut qiviarlugu Tusagassiivimmut oqarpoq.
– Uagut, namminersorfiusut, qallunaat naalakkersuisuinut ataatsimut oqaaseqaateqassaagut. Immitsinnut tapersersussaagut suleqatigiinnissamullu periarfissat misissorlugitr, Aleqa Hammond oqarpoq.
Tamatuma saniatigut Naalakkersuisut siulittaasuat oqarpoq Savalimmiunik qaninnerusumik suleqateqalerneq pisussaaffiliisoq ataatsimut periarfissat killissallu sammineqarnissaannik.
– Taamaasilluni savalimmiuni naalakkersuisut siulittaasuata uangalu sulinerput naalagaaffeqatigiinnut atatillugu naleqqussarparput, Aleqa Hammond oqarpoq.
Naalagaaffeqatigiit ataatsimiinnerat annertusisaq
Naalagaaffeqatigiit kingullermik aggustimi ataatsimiinneranni Aleqa Hammondip kissaatigaa naalagaaffeqatigiit ataatsimiinnerat annertusineqassasoq.
– Naalagaaffeqatigiit ataatsimiittarnerat aalajangiiviusarneq ajoraluartoq ataatsimiinnerup annertusineqarnissaa kissaatigaara. Siunissamilu sammisat pingaarutillit oqaloqatigiissutigineqartariaqarnerat annikillinavianngilaq, Ishøjimi naalagaaffeqatigiit ataatsimiinnerisa kingorna tusagassiortunik katersortitsinermi Aleqa Hammond Sermitsiaq.AG-mut oqarpoq.
– Kalaallit Nunaata sammisaqarfinni amerlanerusuni isumaqatigiinniarsinnaanermut pisinnaatitaaffinnik tigusiartornera ilutigalugu naalagaafffeqatigiit iluanni ataqatigiissaarinissaq annertusiartussaaq, Naalakkersuisut siulittaasuat oqarpoq.