Alaskami naggueqatigiit Inuit uuliasiornissaq tapersersoraat
Ukiut marluk matuma siornagut Naalakkersuisut nalunaartut silap pissusia avatangiisillu mianeralugit Kalaallit Nunaanni uuliamik ujaasisoqarunnaassasoq, Alaskami naggueqatigiit Inuit taama mianersortiginngillat. Tassani amerlanerussuteqartut suliniut præsident Bidenip akuersissuteqarfigeqqammigaa tapersersorpaat, Alaskami sumiiffimmi North Slopemik taaneqartartumi mianernartumik pinngortitaqartumi uuliamik nappartanik millionilikkaanik qalluinissaq akueralugu.
Suliniut Willowimik taaguuteqarpoq (orpigaq). Uuliasiornissamut ingerlatseqatigiiffik ConocoPhilips issittup masarsuani qeriuaannartumi qillerisinnaalluni, pinngortitami USA-mi pinngortitami innarlerneqarsimanngitsut annersaani. Ilimagineqarpoq ukiuni 30-ni uulia nappartani 600 millionini qallorneqarsinnaasoq.
Aviisi AG taama allappoq.
Suliniut Alaskami annertuumik tapersersorneqarpoq, aamma nagguteqatigiinni Inunni The North Slope Boroughimiittuni, NSB, naalagaaffiup avannarpasinnersaani uuliamik qalluiffissami. Nunap immikkoortua annermik Inunnit najugaqarfigineqarpoq namminersortutut aqunneqarluni.
- NSB-mi amerlanerpaat Willow illersorpaat. Tamarmiunngitsulli, kisianni amerlanerussuteqarluartut, Jimmy Stotts nammineq Alaskap avannamut sineriaani inunngorlunilu peroriartorsimasoq oqarpoq, ukiunilu arlalissuarni Inuit Circumpolar Councilimut attuumalluni, ilaatigut Alaskami ICC-mi præsidentiulluni. Maniitsumeersoq Karo Heilmann nuliaraa.
Stotts oqarpoq suliniutip oqaluuserineqarnera ilungersunartupilussuusoq, taamaallaallu aningaasat avatangiisillu imminnut akerleriinnerannik suliaalersimalluni.
Nammineq Willowimi kulturimut tunngasut oqaluuserineqarnissaat maqaasivaa:
- Naggueqatigiinnut Inunnut pingaaruteqartut oqallinnermi issoqqaarissumi ipitinneqarput. Avannaani nunap inoqqaavinut tunngasut samminissaat ajornakusoorpoq.
Aviisimi AG-mi atuarnerusinnaavutit. Aviisi uani pissarsiariuk:
