Aalborg

Akuutitsinissamut siunnersuisoqatigiinni kalaaleq ilaasortaq

Juusi W. Petersen Aalborgip kommuniani akuutitsinissamut siunnersuisoqatigiinnut ilaasortanngorpoq. Taassuma kalaallit Danmarkimiittut assigiinngissitaarnerusumik takutinniarniarpai

Aalborgip kommuniani akuutitsinissamut sulinermi kalaaleq toqqaannartumik sunniuteqalissaaq. Juusi W. Petersen Aalborgimi akuutitsinissamut siunnersuisoqatigiinni ilaasortanngorpoq. Siunnersuisoqatigiit ilaatigut akuutitsinissamut apeqqutinik siunnersuinissamut suliaqartarput.

- Sulinissamut qilanaartorujussuuvunga, Juusi W. Petersen, Sermitsiaq.AG-mut oqarpoq.

Kalaallit sinniisoqalertinnissaat ukiorpassuarni ilungersornikkut anguniarneqarsimavoq. Qaammat ataaseq qaangiuppat Juusi W. Petersen sulilissaaq.

Inuit isaannit suliniutit
Siunnersuisoqatigiit kommunimi qinikkanut kommunillu aqutsineranut aalajangersimasunik suliaqarnermi siunnersortarpaat.

- Suliniutit ikiorneqartussat qulaatiinnarlugit pisannginnissaat qulakkiissallugu, suliassatut pingaarutilittut isigaara. Tassani inuunerminni atugaat aallaavigineqassapput, Juusi W. Petersen oqarpoq.

Kalaaliulluni siunnersuisoqatigiinnermiinnini pisariaqartoq aamma isumaqarpoq.

- Kalaalerpassuit Danmarkiliartartut inunnit kulturinit allanit aggersunut assingusunik unammilligassaqartarput. Sulinera aallartikkukku suut ataatsimoorunneqarnersut nassaariniartariaqarpagut.

Kalaallit eqqortumik saqqummiunniarai
Juusi W. Petersen uummammiuminik aamma siunnersuisoqatigiinnut apuussaqarniarpoq. Tassami suna tamarmi Aalborgimi kalaallinut 300-nut atugarliortunut tunngassanngilaq, kisianni aamma 2.700-t allat pineqassapput.

- Suliama pingaarnerit ilagissavaat uagut kalaallit Danmarkimiittut pillugit oqaluttuap eqqortup oqaluttuarinissaa, ingammik Aalborgimi, tassanilu kalaallit inuuniarnermikkut atugarliortut uagut kalaallit pilluta ukiuni amerlavallaani oqaluuserisassanngortinneqartarsimagatta, taanna oqarpoq.

Powered by Labrador CMS