assit takukkit
Akuutissanik Nuup umiarsualiviani seerisoqartoq
Qatserisartut illersuutinik atisalerlutik Nuup umiarsualiaviani pingasunngornermi suliaqarput
Royal Arctic Linep umiarsuani Naja Arcticami akuutissanik seerisoqartoq pingasunngornermi ualikkut paasineqarpoq. Saltpetersyre 120 literi containerimi seerisimavoq. Qatserisartut illersuutinik atisallit mingutsinneqartoq salereermassuk usigiaaneq ingerlaqqippoq.
Naja Arctica Nuummut tikeriitsiaannartoq paasineqarpoq akuutissanik seerisoqartoq. Taamaasimmaat qatserisartut kalerrikkasuarneqarput.
- Pinartumik pisoqanngikkaluartoq, kisianni suliat taamatut ittut mianersoqqissaarluni suliassaapput, Royal Arctic Linemi attaveqarnermut pisortaq Jakob Strøm Sermitsiaq.AG-mut oqarpoq.
Containerit ilaat nassiussanik ulorianartunik taaneqartartunik imaqarpoq.
- Saltpetersyre 120 literip missaa seerisimavoq. Mingutsinneqartoq aammalu containeri inissisimaffigisimasaat salinneqarput. Dunkit arfinillit akuutissanik imallit ajoqusersimapput taamalu seerisimallutik, Nuummi qatserisartut pisortaaq Knud Petersen Sermitsiaq.AG-mut oqarpoq.
Dunkit umiarsualivimmiit peerneqarput saviminernullu eqqaavissuup eqqaani saleqqissaarneqarlutik.
Naja Arctica sisamanngornermi Sisimiunut ingerlaqqippoq.