Akutaanerup assammik arsarneq ineriartortissavaa

Assammik arsarnerup ineriartortinneqarnissaa anguniarlugu Akutaaneq Kreutzmann Timersoqatigiiffiit Assammik Arsartartut Kattuffianni siunnersortitut atorfinitsinneqarpoq.

Timersoqatigiiffiit ineriartornissaat anguniarlugu ilaatigut attaveqaataassaaq, tassani qanoq timersuut ineriartortinneqarsinnaanersoq siunnersuisassalluni.

Unammisartut ikilisimanerat

Assammik arsarnermik soqutiginarsaaneq aallutissavaa.

- Ukiut arlaqanngitsut iluanni unammisartorpassuit taamaatinnikuupput, aamma malunnarpoq timersoqatigiiffiit Nunatsinni pissartarnngorniunnissamut kisimi sungiusartalersimasut. Ineriartorneq taanna allanngortinneqartariaqarpoq, taamaattumik meeqqat inuusuttuaqqallu sulininnut atatillugu sulissutiginerussavakka. Timersuutip tungaatigut misigisaqartittalernissaat aallutissavara, aamma GM-it avataatigut misigisaqartittalernissaat pingaartissavara, Akutaaneq Kreutzmann Sermitsiaq.AG-mut oqarpoq.

- Timersuut ineriartorfissaqarluarpoq, ilaqutariissusermik misigilersitsisarpoq. Aallarterlaat pitsaanerusumik sullinneqartalissapput, soorunami aamma nunanut allanut unammisartuulernissamut aqqutsissiuussisoqartassaaq, tikkuaavoq.

Qanimut suleqatigiinneq

Inerisaanermik suliniut ataavartuussaaq, ukiuni arlalinni suliniut ingerlasinnaassalluni, Akutaaneq Kreutzmann oqarpoq.

- Angajoqqaat sungiusaasullu qanimut suleqatigineqassapput, soorunami aamma timersortarfiit tassani akuutinneqassapput. Meeqqat inuusuttullu timertik aalatinnerulertariaqarpaat, taamaattumik assammik arsarnerup saniatigut aamma allanik sammisaqartitsisoqartassaaq, oqaluttuarpoq.

Timersorneq aqqutigalugu ineriartorneq

Kalaallit Nunaata Nunarsuarmi tamani timimik aalatitsinerpaanngornissaanik Kalaallit Nunaata Timersoqatigiiffiata anguniagaa assammik arsarnerup tapersersorpaa.

Taamaattumik assammik arsartartup misilittakkani ingerlateqqinniarpai.

- Meeraallungali assigiinngitsunik timersortareerpunga, taamaattumik misilittagarilersimasakka meeqqanut inuusuttuaqqanullu ingerlateqqissavakka, tassani qanoq ineriartorsimanera takutittassallugu. Timersoqatigiiffiit Assammik Arsartartut Kattuffianni sulilernissara qilanaaraara, Akutaaneq Kreutzmann oqarpoq.

Taanna marsip aallaqqaataanit atorfinissaaq.