assammik arsarneq

Akutaaneq Kreutzmann Ribe-Esbjergimi arsaqataalluni DM-semifinaleqataassaaq

Mors-Thymut unamminermi Ribe-Esbjerg 24-23-mik ajugaavoq DM-semifinalernissaminullu piareerluni.

Akutaaneq Kreutzmann og Ribe Esbjerg med gode muligheder for en semifinaleplads.
Akutaaneq Kreutzmann assammik arsartoq. Asseq toqqorsivimmiit.

Angutit assammik arsartartut Ribe-Esbjergimeersut Akutaaneq Kreutzmannimik arsartullit Mors-Thymut naggammik assammik arsarlutik unammereerlutik DM-semifinalernissaminnut piareerput.

TTH Holstebro udekampimi Bjerringbro-Silkeborg (BSV)-mut 33-26-mik ajugaagamik Ribe-Esbjerg ingerlaqqipput. Taakku 24-23-mik nikingassuteqarlutik ajugaapput.

Taamaasillutik jyllandip kitaamiui 9 pointimik ajugaapput BSV-lu 8 pointimik semifinalernissaminnut TTH ajorsartillugu ingerlaqqillutik.

TTH aamma 8 pointimik naggasiivoq, BSV-kkunnulli sanilliullutik arsarnerlunnerullutik.

Arsariat Ribe-Esbjergimeersut Nykøbing Morsimi unamminerminni angusarissaarput, Lukas Karlssonillu unamminermi unikkallannginnermi minutsit qulingiluat sioqqullugit 13-8-mik siuaqqammat DM-semifinaleqataanissaat ilimanarsivoq.

Taamaakkaluartorli Mors-Thy ajorsaleramik sukataalerput.

Unikkallarnissamut minutsit qulingiluat kingulliit 5-1-mik ajugaaffigaat, taamaasillutik Ribe-Esbjerg atisaajartarfimmut 14-13-mik siuaqqanertik nassarpaat.

Unamminerup aappaani isertinneqartut naligiilerput, Ribe-Esbjergillu semifinalimut anngunnissaa ilimanarunnaarpoq, tassami TTH Holstebro BSV-mut ajugaanissaa qulakkeerneqarmat.

Arsartartulli jyllandip kitaaneersut illersuisoqarluarput, tassanilu måliniittoq misilittagaqarluartoq Søren Haagen arsarluaqaluni.

2 minutsiinnanngortoq unammiartortut 19-16-mik siuaqqapput, Mors-Thyli unamminermi siuaqqajuarpoq.

Minutsit tallimat tulliuttut unammineq 22-22-mik naligiiffiuvoq minutsillu marluinnanngormata 23-23-mik naligiiffiulluni.

Jacob Holm isertitsimmat unammineq 24-23-mik inerneqarpoq, Mors-Thylu saassussinermini kingullermi uluatsitsinngitsoorluni.

Powered by Labrador CMS