Akutaaneq Kreutzmann GOG-mi inissippoq

23-nik ukiullip Akutaaneq Kreutzmannip isertuussinnaanngilaa ukiut unammiuaarfiusut marluk Vejle Håndboldimeereerluni 1. Divisionimiilernissaminik assut kissaateqarsimagami. Kissaatai maannakkut piviusunngulerput.

Sermitsiaq.AG-mit Akutaaneq Kreutzmann nuannaaqisoq naammagisimaarinnilluartorlu oqaloqatigineqarpoq.

• GOG ukiuni marlunni atuuttussamik isumaqatigiissuteqarfigaara. Minik Dahl Høegh holdeqatigilissavara Jakob Larsen sungiusaasuunerissallugu. Sapaatip-akunnerini arlalissuarni GOG sungiusaqatigereerpakka. Arsaattartut allat ilisarisimallugit Gudmemilu pissutsit nalunagit, taamaattumik ajorpallaarnavianngilaq.
• Nalunngilara pissutsit allarluinnaat iserfigissallugit. 1. Divisionimi aamma Håndboldligami pissutsit assigiinngitsorujussuupput, eqqortumilli oqaatigalugu qilanaartorujussuuvunga. Tassa tamanna 2006-imili Silkeborgimut nuukkaali Silkeborg-Voel KFUM-imi assammik arsaqataasaleramali takorloortuarsimasara.

Akutaaneq Kreutzmann assammik arsartarnini Maniitsumi Aqissiami aallartippaa Danmarkimi Silkeborg-Voel KFUM, BSV, Odder Håndbold ukiunilu marlunni kingullerni Vejle Håndbold peqataaffigisimallugit.

Akutaaneq Kreutzmannip Silkeborgimi toqqissisimanartoq qimallugu Odensemut nuuppoq, maannakkullu allamik suliassaqanngilaq sungiusarneq taamaallaat GOG-miut ukiamut pimanerni Håndboldligami unammeqataasalernissaaminnut pitsaanerpaamik sungiusarsimareerniassammata. Akutaaneq Kreutzmann qaammatini kingullernisuulli siornatigut taamak nukkassartigisimanngisaannarpoq. Pisariaqarnikuunngilaq pikkorilluinnartuummat. Maannakkulli suut tamaasa ilungersuunnerusariaqarpai aamma Jakob Larsenip naalakkisaartitsilluni aqutsinerani Odensemi OBBC-p sungiusartarfiani kivittaagassat angisuut oqimaatsullu ilungersorluni sungiusaataassapput.

Angorusutatut naatsorsuutigisat

Soorunami GOG-mit timersoqatigiiffimmi peqataalersussamik isumaqatigiissuteqarneq aallaavigalugu naatsorsuutigisaqartoqarpoq. Sungiusaasuuneq Jakob Larsen suleqatigiilernissamik qilanaaruteqartoq Sermitsiaq.AG-mut oqarpoq:

Akutaanerup ineriartornera ukiuni kingullerni pitsanngoriartuinnarsimavoq. 1. divisionimi assut pingaaruteqarsimavoq aamma maannakkut piffissaq eqqorlugu ingerlariaqqippoq. Teknikkikkut taktikkikkullu pikkorilluinnartuuvoq ungasianit isertitseriallaqqilluni.

• Maannakkut nukittorsarnissaa pingaaruteqarpoq. 10 kilonik oqimaannerulernissaa anguniagaavoq. Eqqaamasariaqarparput Håndboldligami arsaattartut amerlaqaat angillutillu nukittuujusut.
• Aamma soorunami qilanaaraara nunanut allanut unammisartoqatinnik suleqateqalernissara nunanut allanut unammisarnitsinni soorlu Pan Amerikamiut unammiuaarnerini takutitsilluartartumik.

Akutaaneq Kreutzmann aaamma Minik Dahl Høegh tamarmik saamimmi tunorlermi arsartarput neriuppunga GOG-p kalaallit arsaattartut pitsaanerpaartai marluk iluaqqutigilluassagai. Nuannaarpunga tulluussimaarutigalugulu kalaallit assammik arsartartut taamak pikkoritsigisut GOG-mi peqataalissammata.