Akutaaneq Japanimi klubbeqarunnaarpoq

Assammik arsarluni nunanut allanut unammisartoq Akutaaneq Kreutzmann Japanimi najugaqarnermini ukiumi unammiffiusumi matumani 80-eriarluni isertitsivoq, isertitsissutaasunik tunniussai aamma taama amerlatigalutik. Maannali Japanimi unammisartuujunnaarpoq.

Tassami klubbiata Toyoda Gosei Blue Falconip isumaqatigiissut sivitsoqqikkumanngilaa.

Akutaaneq Kreutzmann Danmarkimut tallimanngorpat aallassaaq, nutaamillu maanna klubbissarsiulerluni, Sermitsiaq.AG-mut ilisimatitsivoq.

Japanimi corona ernumatitsivoq

- Maani najugaqarluni misigisaq nuanneqaaq. Inuit aamma kulturi nutaaq naapippakka, unamminikka aamma maani tulluusimaarutigaakka, oqarpoq.

Japanimi coronavirusertoqarnera pissutaalluni ukioq manna unammiffiusoq naammassineqajaarpoq. Klubbia pingajuattut inissilluni naammassivoq, unammineq ataaseq amigaatigiinnaraluarlugu.

- Unammeqqinngitsoornerput uggoreqaarput, aappaattummi inissinnissatsinnut periarfissagissaarlualeraluarpugut. Unammillluaqattaaleraluarpugut unamminerni kingullerni, taamaattoq maani naalakkersuisut aalajangiinerat ataqqiinnartariaqalerparput, tassani pisussat arlalippassuit aamma timersornermi unamminissarpassuugaluit coronavirusertoqarnera pissutaalluni unitsiinnarneqarput, Akutaaneq Kreutzmann oqaluttuarpoq.

Oqalutseqartoq

Japanimut ukioq kingulleq juulimi nuuppoq. Unammisartuulernissaanut akuersissut siullermik ajornartorsiutigeqqaarpaa, taanna aaqqinneqarmat unamminissaminut piareermat sungiusaasuata aalajangerpaa paarlatsitut inissisimaqqaassasoq.

- Unammillertigali oktobarimi ajoqquserami isersimaqqaartartunngorpunga. Tassanngaanniit unamminerpassuit peqataaffigilerpakka. Unammeriaatsitigut aamma inuttut ineriartorluarsimallunga misigaanga. Soorunami oqaloqatigiinniarnerit tungaatigut ajornartorsiuteqarpugut, kisianni nutserisoqarpunga sunut tamanut taassuma ilagisarpaanga. Klubbeqatikka piffissami sivitsortumi maanna assammik arsarnerup tungaatigut oqaloqatigilluarsinnaalernikuuakka, oqaluttuarpoq.

Japanimi ligami pitsaanerit sisamat Danmarkimi unammisartunut malinnaalluarsinnaassasut nalilerpaa.

- Taamaattoq maani assammik arsarnermi qanoq Danmarkimi ligamit qanoq inissisimarpiarnersoq nalileruminaappoq. Danmarkimi unammisartut anginerullutillu nukittunerupput, maani minikerupput sukkanerullutillu, oqarpoq.

Klubbimik nutaamik ujaasivoq

- Japanimi najugaqarninni paasisarpassuaqarpunga, soorlu klubbinik piginnittut sungiusaasunit pissaaneqarnerupput unammiffiup iluani susoqassanersoq. Klubbinik piginnittut pissaaneqartorujussuupput soqartassanersoq, tamanna uanga eqqarsartaasera malillugu eqqortuunngilaq, kisianni maannga eqqarsartaasaat allanngortinniarlugu nuunnikuunngilanga. Unamminermi kisitsisit maani pingaartinneqartorujussuusarput, unammineq tamaat isigineqarneq ajorluni. Aamma tupinnaannartumik unamminermi tallimariarluni allortut maani akuerineqartarput, assut paasiuminaatseqqaarnikuuara, kisianni maannga nuussallunga aalajangernikuunera ugguarinngeqaara, qujassutigeqaaralu maani najugaqarsinnaagama, Akutaaneq Kreutzmann oqaluttuarpoq.

- Taava maanna susoqassava?

- Europami unammisartunngoqqikkusuppunga. Danmarkimili unammisartunngoqqikkusunngilanga, tamanna misigereerpara aamma ukiuni aqqanilinni unammisartuuffigereerakku uterfigeqqikkusunngilara. Nunamili allami unammisartunngoqqikkusuppunga, Akutaaneq Kreutzmann, maanna klubbimik nutaamik ujaasisoq, akivoq.