Fokus
Akutaaneq, Jakob aamma Minik unamminermi tv-kut aallakaatinneqartuni pingasuni
Håndboldligami aallartilluareerluni GOG-p unammineri pingasut tv-kut aallakaatinneqassapput
Maluginiarneqanngitsoorsimanngilaq GOG-ip, nunanut allanut unammisartunik Akutaaneq Kreutzmann-imik Minik Dahl Høeghimillu unammisartullip Jakob Larsenimillu sungiusaasullip sæsonimi unamminerni siullerni tallimani sisamariarluni ajugaasimanera maannalu Håndboldliga-mi normu 3-tut inissisimalluni.
Arfininngormat ualikkut Ribemi 800-nik isiginnaartoqarluni GOG-p unammisarfimmini unammisoq Ribe/Esbjerg 36-26-mik ajugaaffigerujussuarpaa. Minik Dahl Høegh tuimigut pilatsinnermi kingorna aatsaat taama unammilluartigaaq, sæsonimilu kingullermi sukalassutsini tigujartorlugu. Minik Dahl Høegh tallimanik isertitsivoq. Akutaaneq Kreutzmann, sapaatip akunnerata naanerani kingullermi unamminermi ajoqusersimasoq Ribe-mut unamminissamut piareersimavoq. Sapaatilli akunnerani sungiusarsimannginnami unammeqataanngilaq. Unamminermi arsarluarnersaavoq GOG-mi unammisartoq islandimiu Snorri Gudjonsson.
Unamminerit pingasut tv-kut aallakaatinneqassapput
GOG arfininngorpat unammeqqeriissaaq. Unammisarfimmini GOG Arena-mi siuttoqatini, suli ajugaaffigineqarsimanngitsoq KIF Kolding, ilaatigut Kasper Hvidt-imik, Joachim Boldsenimik, Lasse Boesenimik minnerunngitsumillu svenskimik Kim Anderssonimik unammisartulik unammissavaa. Inissat tamarmik tunineqareersimapput. Unammineq TV2-kut aallakaatinneqassaaq. Aamma oktobarip 12-anni Bjerringbro/Silkeborgimut unamminerat TV2-kut aallakaatinneqassaaq. Kiisalu pokalkvartfinalimi Team Tvis Holstrebro-mut unamminerat TV3 Sport-ikkut aallakaatinneqassaaq.
– Soorunami uagutsinnik nersualaarinerulluinnarpoq taama amerlatigisunik tv-kut aallakaatinneqarnissarput. Tamanna klubbimut, aningaasaliisunut holdimillu sulisunut minnerunngitsumillu unammisartunut pingaaruteqartorujussuuvoq. Holdimi unammisartorpassuaqarpugut unamminermi TV-kut aallakaatinneqartumi peqataasimanngisaannartunik, Jakob Larsen Sermitsiaq.AG-mut oqaluttuarpoq nangillunilu:
– KIF Kolding-imut unamminissaq ajornakusuussaqaaq. Arsartartorissaaqaat taavalu Kasper Hvidt måliniittoraat, ukiut ingerlaneranni unamminernik pingaarutilinnik aalajangiisuusarsimasoq. Soorunami KIF Kolding ajugaasussatut ilimagineqarneruvoq. Siusinnerusukkut unamminerpassuit taamaattut ingerlattarsimavai, uagutsinnut tamanna nutaajusoq. Siuttunut peqataanerput nuannaarutigaarput soorunamilu arfininngorpat unammissaagut ajugaaniarluta.