Akunnittarfiutilik Carl Juhl toquvoq
Inuussutissarsiutinik ingerlatsisoq Carl Juhl sivikitsumik napparsimareerluni maajip 4-aniRigshospitalimi toquvoq.
Carl Juhl inuunermini ukiunik 77-inik sivisussuseqartumit inuit amerlanerpaartaannit
angusaqarnerusimavoq piginneqatinilu Helge Tang peqatigalugu akunnittarfeqarnermi
neriniartarfeqarnermilu kiisalu illuutinik ingerlatseqatigiiffinni arlalinni aningaasaliisutut Kalaallit Nunaanni immikkut malunnaateqarsimalluni.
Carl Juhl qalipaasutut ilinniagaqarsimavoq. Horsensimi 1944-mi inunngorsimavoq,
angerlarsimaffimmilu indremissionskiusumi atugarissaarpallaarnani peroriartorsimalluni.
Qalipaasutut ilinniakkani aqqutigalugu Sisimiuniilersimavoq, tassanilu inuussutissarsiutinik
ingerlatsisutut eqeersimaartutut suliniuteqarumatuutullu ilisimaneqalertorluni..
Piginneqatigiinneq
Aamma Sisimiuni Helge Tang 1976-imi naapissimavaa, niuernikkullu piginneqatigiinneq
ikinngutigiinnerlu nalinginnaanngitsoq taamaalilluni tunngavilerneqarsimalluni.
Carl Juhl, Helge Tang peqatigalugu, Sisimiuni, Maniitsumi Nuummilu akunnittarfinnik
pisiortorsimavoq, ukiullu 45-t suleqatigiiffigisamik ingerlaneranni Danmarkimi Kalaallit
Nunaannilu suliffeqarfippassuarnik pigisaqarsimapput.
1988-imi Hotel Godthaab pisiaraat, 1987-imi Nuummi Hotel Hans Egede sisamanik ullorialik sanavaat, taannalu 2013-imi angisuumik ataatsimeersuartarfilerlugu allilerneqarluni.
Quiasaallaqqissoq
HHE-p ataatsimeersuartarfiata atoqqaaartinneqarnerani kikkunnut tamanut saqqummernermi kingulliit ilaanni Carl Juhlip quiasaariallaqqinnermigut qanoq ililluni allanik qungujutsitsisinnaanini qulaarpaa.
Tassani tikilluaqqusilluni oqalugiarpoq piginneqatigiillu marluusut akornanni suliassanik
agguataarineq oqaatigalugu:
– Taava isumaqatigiippugut … Imaluunniit Helge imminut isumaqatigiissuteqarfigivoq,
pisatsersornera aalajangersinnaagini, taavalu uanga tikilluaqqusillunga oqalugiarsinnaasunga, Carl Juhl, akunnittarfik sisamanik ulloriaqarsimanerminiit tallimanik ulloriaqalermat Sermitsiaq.AG-mi allaaserisaq naapertorlugu, oqarpoq.
Oqalugiarnermini sulerulunneq Kalaallit Nunaanni akunnittarfiit nuimanerpaaartaasa ilaata
ineriartortinneqarneranut tunuliaqutaasoq aamma oqaluttuaraa. Carl Juhlimut ilisarnaataasumik inuunini tamakkerlugu sulerulunnissaminut suliassallu isumaginissaannut
ersissuteqanngisaannarsimavoq.
– Siuariartorneq tassaanngilaq tunissutisiarineqartartoq. Tassaavoq pilersinneqartartoq,
oqarsimavoq.
Ingerlatseqatigiiffinnut arlalissuarnut peqataasimasoq
Carl Juhl siulersuisorpassuarnut ilaasortaasimavoq, siulittaasuusimalluni pisortaanerusimallunilu. Piffissami soqutigineqartunik maluginiagaqallaqqissutut ilisimaneqarsimavoq, immikkuullarissumillu quiasaariaaseqarnini tunngavigalugu niuertutut malunnaateqarluartutut nuannarineqarluarsimalluni.
Decembarimi 2020-mi illuutinik ingerlatseqatigiiffimmik Imeqarfik Aps.-imik, Nuummi koruunit milliardip affaata nalinginut sanaartornermut tunuliaqutaasumik, pilersitseqataavoq. Tamatuma saniatigut ilaatigut makkuninnga piginneqataavoq: Polarbo Aps., HC Ejendomme Nuuk A/S, illuutinik ingerlatseqatigiiffiit marluk Nuuk City aamma Sermersooq - Hotel Hans Egede A/S-ip affaanik piginnittuunermi saniatigut.
Carl Juhl aamma uiulluni ataataasimavoq. Ilaquttaminik qanoq tulluusimaarutiginnitsiginini
isertuutinngisaannarsimavaa. Nulii qitornanilu tallimat qimatarai.