Akunnittarfiup pisortaa: Amerlanernik iluanaaruteqartariaqarpugut
Hotel Arcticimi pisortanngortoq, Morten Nielsen, piginnittut ilaannit ilisimatinneqarsimavoq, akunnittarfik 100 millioner koruunit sinnerlugit aningaasaliisoqarsimanerata kingorna aningaasanik amerlanernik iluanaaruteqartariaqartoq
Takornariat pisuut nunarsuarmit tamarmit pisut aasaanerani ukiut tamaasa Ilulissani Hotel Arcticimut tikerartarput. Kangerlummi iluliarsuit pinngortitarlu kusanartoq pissuteqavissumik kajungernermut pissutaalluinnartarput, Sermitsiaq allappoq.
Siunissamili takornariaqarnerpaaffiup juunimi, juulimi aggustimilu pisartup avataani aamma takornariat nalinginnaasumik isertitallit siunnerfigineqartalissapput.
Taama Hotel Arcticip pisortaanertaava, Morten Nielsen, oqarpoq.
– Akunnittarfiup matuma kusanartumik inississimaffeqartup, isikkiveqartup pitsaasunillu nerisassaateqartup inunnit nuannarineqarluarnera takornariartitsisartunut nittarsaassinermi Vestnorden Travel Martimi takornariartitsisartunik angalatitsivinnullu sinniisunik nunarsuarmit tamarmeersunik oqaloqateqartarninni misigisimavara, oqarpoq.
Morten Nielsen nunat tamalaat akornanni takornariartitsisartunut nittarsaassinersuarmit ukioq manna Islandimi Akureyrimi ingerlanneqartumit uteqqammerpoq.
Iluanaaruteqarnerunissaq
Akunnittarfiup ukiuni 25-ni pisortaa tusaamasaq, Erik Bjerregaard, qaammatit aappaata affaata matuma siorna taarserlugu pisortanngorpoq. Hotel Arctic 2017-imi akileraarutit ilanngaatigereerlugit 5,5 millioner koruuninik sinneqartooruteqarluni 57,4 millioner koruuninillu kaaviiaartitaqarluni Bjerregaard siuttoralugu maannamut aatsaat taama angusarissaartigaaq.
- Akunnittarfimmik piginnittut ilaannit, Air Greenlandimit, qinnuigineqarsimavunga ingerlatsineq aaqqiissuteqarfigeqqullugu, akunnittarfik aningaasanik amerlanernik iluanaaruteqartalersinnaaqqullugu. Akileraarutit ilanngaatigereerlugit 5,5 millioner koruuninik sinneqartooruteqarneq annertugisassaanngilaq, ukiut ingerlaneranni 100 millioner koruunit sinnerlugit aningaasaliissuteqartoqarsimanera eqqarsaatigissagaanni, Morten Nielsen oqarpoq.
Allaaserineqartoq aviisimi Sermitsiami tamakkiisumik atuarneqarsinnaavoq. Aviisi uani pisiariuk: