Akunnittarfittaaq matugallartussanngortoq
Covid-19 pissutaalluni akunnittarfittaamut inniminniisartut ikilineri pissutaalluni Nuummiittoq HHE Express novembarip 13-anit februaarip aallaqqaataata tungaanut matugallartussanngorpoq.
Aggustimi akunnittarfik ammartoq Nuummiittoq, HHE Express, qaammatit pingajuat avillugu ammareerluni matugallartussanngorpoq.
Hotel Hans Egede A/S tusagassiutinut nalunaarummi allappoq.
- Sulisunik soraarsitsisariaqarnikuuvugut, maannalu aalajangerpugut HHE Express matugallassasoq, Hotel Hans Egede A/S-imi siulersuisuni siulittaasoq Helge Tang tusagassiutinut nalunaarummi oqarpoq. Taassuma nuna tamakkerlugu akunnittarfinnik sullissisut ernumagai.
Akunnittarfimmut allamut nuutsinneqassasut
HHE Express novembarip 13-anit matugallarneqassaaq, maannamuugallartoq februaarip aallaqqaataata tungaanut matoqqatinneqarallassaaq, sivitsorsinnaavorli. Tassami ulluni tallimani tikereernermit mattusimatitsisarneq sivisunerusumik attanneqassappat matoqqatinneqarnera sivitsorsinnaavoq.
- HHE Expressimut inniminniisimasut Hotel Hans Egede-mut nuutsinneqassapput, eqqugaasut tamaasa ilisimatinneqassapput, ilisimatitsissutigineqarpoq.
Mattusimagallartarneq eqquisoq
Nunatsinnut tikereernermi ulluni tallimani mattusimagallarnissamut peqqussuteqartoqarnera eqquisoq tikkuarneqarpoq, tamannalu pissutaalluni akunnittarfik matoqqatinneqarallartariaqalerluni.
- Qularnaatsumik corona pillugu suleriuseqartoqartariaqartoq ilisimaarineqarpoq, tamanna takornarianit aamma ilisimaneqarpoq. Akunnittarfinni takornarianillu sullissinermut suliaqartuni eqqugaasoqarnikuunngilaq. Neriulluarnikuugaluarpugut sapaatit akunnerini kingullerni, taamaattoq ulluni tallimani mattusimagallarnissamik noqqaasoqarnera akunnittarfinnik sullissisunut aamma takornarialerisunut eqquerujussuarpoq, Helge Tang nassuiaavoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...