Akunnittarfinni unnuisimasut ikileriarujussuartut

Kalaallit Nunaanni Naatsorsueqqissaartarfiup kisitsisaataasa nutaat takutippaat, ukioq manna qaammatini pingasuni siullerni, siornamut sanilliullugu, akunnittarfinni assigisaannilu unnuisimasut 25 procentit sinnerlugit ikileriarsimasut.

Nuna tamakkerlugu aammalu nunat tamalaat akornanni COVID-19-imik peqquteqartumik angallattoqaqqusaajunnaarnerata kingorna akunnittarfinni inisisimasunut unnuisunullu naatsorsuutit siulliit takutippaat, Kalaallit Nunaat tamakkerlugu akunnittarfinni inisisimasut kiisalu unnuinerit ikileriarsimasut.

Kalaallit Nunaanni Naatsorsueqqissaartarfiup kisitsisaataasa nutaat tamanna takutippaat.

- Tamanna qaammat marsimi angallattoqaqqusaajunnaarnerata atuutsinneqarlerneranik peqquteqarpoq, ukiullu siuliani qaammammut pineqartumut sanilliullugit akunnittarfinni inisisimasut 4.387-inik ikinnerupput, unnuinerillu 11.593-inik ikinnerullutik. Ikiliartornerili febaruaarimi aallartissimavoq, ukiup siualiani qaammammit pineqartumit akunnittarfinni inisisimasut 767-inik aammalu unnuinerit 2.061-inik ikinnerusimallutik, naatsorsueqqissaartarfik allappoq.

Kalaallit Nunaanni akunnittarfinni, vandrehjemmini unnuisarfinnilu allani 49-usuni Naatsorsueqqissaartarfimmullu nalunaarusiortartuni 1.kvartaalimi inisisimallutik unnuisimasut 13.666-iusut unnuinerit 38.249-usimapput.

Tamanna 2019-imi piffissamut pineqartumut sanilliullugu 27,6 pct.-inik kiisalu 26,6 pct.-inik appariarneruvoq.

Ukioq manna kisitsisit siorna kisitsisinut sanilliullugit

Powered by Labrador CMS