Akunnittarfinni unnuisimasut coronaqanngikkallarneranit amerlanerusimasut
Akunnittarfinni unnuisimasut aqqusaarsimasullu ukiup qaammataani siullerni pingasuni 2019-imi piffissami pineqartumut sanilliullutik amerlanerusimapput.
Coronap nunarsuarmi tuniluunnera takornariartitsisartunut sakkortuumik kingunerlussimavoq, kisitsisilli nutaat takutippaat, takornariat amerliartoqqillualersimasut.
Naatsorsueqqissaartarfiup kisitsisaatai naapertorlugit, 2019-imut coronap tuniluuffigisaanut sanilliullugu akunnittarfinni unnuisimasut aqqusaarsimasullu amerlanerusut.
Kalaallit Nunaanni akunnittarfiusunit, unnuisarfiusunit allanillu unnuisarfiusunit katillutik 58-iusunit Naatsorsueqqissaartarfimmut nalunaarutigineqarsimasut naapertorlugit, ukioq manna qaammatini siullerni pingasuni unnuisimasut 57.169-iusimapput.
2019-imi unnuisimasut 52.112-iusimapput. Taamaalilluni 2022-mi unnuisimasut 2019-imi unnuisimasunut sanilliullugit 10 procentimik amerlisimapput.
Najoqqutassiami tulliuttumi takuneqarsinnaavoq, 2019-imi unnuisimasunut sanilliullugu qaammatini ataasiakkaani qanoq unnuisoqarnerusimatiginera, soorunami 2020-mut 2021-mullu nunarsuarmi tuniluuttoqarnerani angalarusuttoqannginneranut sanilliullugit amerlanerusut.
Akunnittarfinnut aqqusaarsimasut aamma taamatut amerleriarsimasut takuneqarsinnaavoq. Qaammatini siullerni pingasuni aqqusaarsimasut 21.137-usimapput.
2019-imi qaammatinut siullernut pingasunut sanilliullugu 11,7 procentimik amerlanerusut, taamanikkut 18.885-it aqqusaarsimagamik.
2021-mi aqqusaarsimasut amerlassusaat kisiat isigissagaanni, aqqusaarsimasut 71,6 procentimik amerleriarsimapput.
- Qeqatta Kommuniani unnuinerit amerlassusaat 90,6 pct.-inik qaffariaateqarlutik annertunerpaapput, naatsorsueqqissaartarfik allappoq.
