Akunnittarfimmik ammaanissaq kinguarteqqinneqartoq
Ulapaarfiunerpaaffiusartumi inniminnikkat tamarmik taamaatiinnarneqarsimapput, maannalu HHE Expressip Nuummi ammaanersiorneqarnissaa qaammatinik marlunnik kinguarteqqinneqartariaqarluni.
Takornariartitsisartut akunnittarfiutillillu coronap atugaaneranit sakkortuumik eqqugaasimapput, taamaammallu HHE Expressimik ammaanissaq qaammatinik marlunnik kinguarteqqinneqartariaqarpoq, akunnittarfiutilik Helge Tang ilisimatitsivoq:
- Inniminnerneqarsimasut tamarmik taamaatiinnarneqarsimapput, isertitassaasinnaasullu annaaneqarlutik, Helge Tang oqaluttuarpoq.
Helge Tangip Nuup qeqqani akunnittarfissamut matuersaatit ullualunnguit matuma siorna tigoreersimagaluarai akunnittarfiup ammarneqarnissaa aggustusip pingajuanut kinguartinneqarpoq:
- Sanaartorneq iluatsilluarluarluni pilersaarutit malillugit ingerlasimagaluartoq, piffissaliussarlu naapertorlugu kusanartumik akunnittarfiliorneq naammassineqaraluartoq misigisaq eqqumiippoq. Akunnittarfimmi inissisimasoqanngilagut, aamma niuertut angalaneranni takornarianillu arlaatigut pissarsinissamut periarfissaqanngilagut, Helge Tang oqarpoq.
Init 264 -it, innimiinniisoqarsimanngitsorli
Hotel Hans Egedemik, coronap atugaaneranit aamma eqqugaasimasumik piginneqataasuuvooq:
- Akunittarfik nutaaq 108-nik initaqarpoq, Hotel Hans Egedelu 156-inik initaqarluni, aatsaavissuarlu inniminniisoqarsimanani. Akerlianik inniminnikkanik taamaatitsiinnarnerit, ukiassaq ilanngullugu taamaatitsiinnarnerit ulapputigineqarput, Helge Tang oqaluttuarpoq.
Ajornartorsiorneq qaanikkaluarpalluunniit, silarsuarlu ingerlaqqilerluni, akunnittarfiit ulikkaarlugit sulisoqaqqilernissaa ajornarsinnaavoq, Helge Tang naliliivoq:
- Tikeraartorisartakkavut siusinaartumik inniminniisarput, nunarpassuarnilu allani pisartut assiginagit piffissaalluartillugu angalanissaminnik pilersaarusiortarlutik, taamaammat pisuå qaqagorsuarmut atugassatsinnik sakkortuumik eqqorpaatigut, Helge Tang oqarpoq.
Taamaammat suliffeqarfissuit pisortallu suliffeqarfiutaat kaammattorpai, aasamut ukiamullu ataatsimiinnissat nunami akunnittarfinni pinissaannik inniminneeqqullugit:
- Akunnittarfiutilinnut tamanut iluaqutaassaaq, Helge Tang oqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...