Akunnittarfiliorniarneq: Ilumoortoq nalorninarsigaangat
Nuutoqqami nutaamik akisuumik akunnittarfiliorniarneq pillugu oqallinnermi ilumuunngitsunik arlalinnik ilanngussisoqartarpoq. Oqallinnermi oqaaserineqarnerusut pingasut suunersut takukkit. Aap, suna ilumoorpa sunalu ilumuunngila.
Sanarfinermut Avatangiisinullu ingerlatsivik, Nuutoqqami akisuumik akunnittarfiliornissamut akuersissuteqarnissamut siunnersuutip tusarniaassutigissallugu kommunalbestyrelsi kingullermik ataatsimiilluni akuersimmat, oqallittoqangaatsiarnissaanik naatsorsuutiginnereerpoq.
Oqallittoqarneranilu paasinarsivoq, oqallissutaasut ilaat ilumuunngitsortaqartut.
Ujup oqaasii imminnut assortuuttutu pingasut
Borgmesterip tulliata Uju Petersenip decembarip pingajuani tusagassiorfinnut nalunaaruteqarnermini nalunaarutigaa, Nuutoqqami akunnittarliorniarnermut akerliulluni. Tusagassiorfinnut nalunaaruteqarnini aallarnerlugu pingasunik oqaaseqarpoq Sermitsiaq.AG-ip misissorsimasaanik.
Oqaasii siullliit
Uju Petersen allappoq:
- Kommunalbestyrelsimi nuutoqqami aqqusernup biilinik angallaffittut matuneqarnissaa siunnersuutiginikuuara akuerineqarlungalu, taamaammat nuutoqqami taassumaluunniit eqqaani akunnittarfiliortoqarnissaa akuerisinnaanngilara.
Sermitsiaq.AG-p Kommuneqarfik Sermersuup allagaataanik takunnikkusussimanermigut paasisimavaa, Uju Petersenip Nuutoqqami aqqusinermik matusisoqarnissaanik oqalunnermini suna pineraa.
Tulliullugu takuneqarsinnaavoq, Uju Petersenip aqqusinermi kigaallassaasersuisoqarnissaanik siunnersuuteqarsimasoq.
Qammatialuit ingerlareersut politikkerit 2017-imiit 2020-mut missingersuutinik suliarineqarneranni Uju Petersenip siunnersuttaa suliarineqartussanngormat aalajangerput, ”aaqqiissuteqarniarlutik pinnersaatitaqarsinnaasunik”.
Amerlanerussuteqartut isumaqarput, Reykjavikkimi suliaqarsimaneq isumassarsiorfigalugu, sammisassaqartitsisoqaraangat biilillu isumannaallisaaneq eqqarsaatigalugu tikilluaqqusaanngittarnerat tunngavigalugu Saviminilerinermik Ilinniarfik suleqatigalugu aqqusineq kigaallassaaserneqassasoq.
Tulliuttumi takuneqarsinnaavoq, Reykjavikkimi sumiiffik biilinut aqqutigeqqusaajunnaarallartoq. Politikkerit isumaqatigiissutigaat, Nuutoqqami biilinut assiaqut qaannatut ilusilerneqassasoq.
Oqaasiisa aappaat:
Uju Petersen allappoq:
- Illoqarfiup pilersaarusiorneqarnerani nuutoqqami allanngortitsioqarnissaanik pilersaaruteqartoqanngilaq.
Kommunimut pilersaarummut tapiliussami IC14-3-mi, november 2011-mi kommunalbestyrelsimit akuerineqarsimasumi takuneqarsinnaavoq, Nuutoqqami sumiiffiit ilaat sanaartorfigineqarsinnaasoq.
Pilersaarummut tapiliussami assitaliunneqarsimasoq una takuuk, tassani sanaartukkat akunnittarfiup akisuup inissisimaffissaatut toqqarneqarsimasumi inissinneqarsimapput – assitaliussap qulaatungaani.
Kommunimut pilersaarummut tapiliussap paragraf 3-ani sumiiffiup atorneqarsinnaanera pillugu imatut allassimasoqarpoq:
Sumiiffik aalajangersarneqarpoq ukununnga atorneqartussatut inissiat, inussutissarsiorneq, umiarsualiveqarneq, takornariaqarneq, niuerneq, neriniartarfeqarneq, akunnittarfeqarneq, qasuersaartarneqarneq piorsarsimassutsimullu tunngassuteqartut.
Oqaasiisa pingajuat:
Uju Petersen allappoq :
- Tamakkualu saniatigut sumiiffik (Nuutoqaq) eqqissisimatitaavoq.
Nuutoqaq eqqissisimatitaanngilaq, illulli ilaat ”eriagisassaaput” allat ”eqqissisimatitaasut”.
Assimi tulliuttumi illut aappaluttut eqqissisimatitaapput illullu qorsuit eriagisassaallutik.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...
