Akunnittarfik corona atuukkaluartoq ammarneqassasoq
Nuummi akunnittarfissap nutaap HHE Express-hotelip ammarneqarnissaa coronap ajornartorsiortisinera pissutigalugu kinguartinneqartarsimavoq, maannali ammarneqassalluni. Piginnittut aalajangersimapput akunnittarfik aggustip 28-ani ammarneqassasoq.
HHE Express apriilip qaammataanili atuutilernissamut piareeqqasimavoq, coronalli ajornartorsiortitsineranit ammarneqarsinnaasimanani.
- Atortussavut tamarmik piareeqqapput, aamma takornarianik maani nunameersunik nunanillu allaneersunik tikilluaqqusinissatsinnut piareeqqavugut, akunnittarfimmik piginnittoq Helge Tang, Hotel Hans Egedemi Covid-19-imut tunngatillugu isumannaallisaanissamut nukippassuarnik atuisoqarsimasoq pillugu erseqqissaasoq oqaluttuarpoq.
- Suliffitsinni ajornartorsiut takkutinngikkallarmalli eqqiluisaartuunissaq isumannaatsuunissarlu pingaartitaraarput, aamma akunnittarfiutitsinut neriniartarfiutitsinnullu pulaartoqarnerani inissisimasutta sulisuttalu isumannaatsumik atugaqarnissaat isumagisarpavut, akunnittarfimmik piginngittoq tusagassiorfinnut nalunaaruteqarnermini qulakkeerinnilluni oqarpoq.
Akunnittarfik pingasunik ullorialikkatut akisuallaanngitsoq
Helge Tang naapertorlugu, akunnittarfik 100 millioner koruunit sinnerlugit akeqarsimasoq, Nuummi akunnittarfiit akikinnerusut siullersarivaat. Akunnittarfiup 108-nik initaqartup atuutsinneqalerneratigut Nuummi unnuiffiusinnaasut amerlineqassapput, aamma akunnittarfik pingasunik ullorialikkatut akisuallaanngitsuuvoq.
Helge Tangip suliffeqarfiit pisortallu suliffeqarfiutai kaammattorpai, akunnittarfimmik tapersersueqqullugit.
- Najukkami ineriartortitsinissamut maanna nukissaqartoqarnerani suliffeqarfiit pisortallu suliffeqarfiutaat ataatsimiinnissamut ataatsimeersuarnissamullu ininik inniminniinissamut maanna periarfissaqarput, Helge Tangs Carl Juhl peqatigalugu akunnittarfiutilik oqarpoq.
Akunnittarfik Permagreen Grønland A/S-imi sananeqarsimavoq, Brøndum Grønland A/S aamma Polar El A/S pilersuisoralugit kiisalu INU:IT qarasaasianik pilersuisoqaralugu. TNT Nuuk akunnittarfissamik titartaasuusimavoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...