Skip to main content

Akunnittarfiit ilungersortut: Ingerlatanut tapersiissutit suli malunniutinngillat

Akunnittarfiutillit coronaqarnerani matusisimaneq suli malugilluarsinnaavaat. Takornarialerinermik suliaqartunut ingerlatat ikiuutaasussat suli malunnartorsiffiginngilagut, HHE-mi pisortaq oqarpoq.

Nuummi Hotel Hans Egedemi aasaanerani tikeraartut takkutinngitsuuipput.

Akunnittarfiup inaataasa affaat ataatingaatsiarlugit kisimik attartorneqartussatut juulimi inniminnerneqarsimapput. Pisortallu tamanna pakatsissutigaa.

- Akunnittarfinnut ukioq manna pitsaanngilluinnarpoq, HHE-mi ingerlatsinermi pisortaq, Jørgen Bay-Kastrup Sermitsiaq.AG-mut oqarpoq.

"Takornariartitsinermik inuussutissarsiuteqartunut ingerlatassat" Naalakkersuisunit sapaatip akunneri marluk matuma siorna saqqummiunneqarput. Tapersiutit taakku najugaqavissut nunap iluani angalallutik aasarsiornissaannut kajumissaatitut taaneqarsinnaapput. Akunnittarfinni unnuinissamut covid-19 pissutigalugu akikilliliineq 500 koruunit tungaannut inissinneqarpoq.

Taamali aaqqiissuteqarneq Hotel Hans Egedemi suli malugineqalinngilaq:

- Najugaqavissunit tikeraarneqarpallaanngilagut. Ikiuutissallu uagutsinnoortut suli malugisimanngilagut, ingerlatsinermi pisortaq oqaluttuarpoq.

Kigaannerusumik ingerlaneq

HHE-p pisortaata nalilerpaa silaannakkut imaatigullu angalaneq akisummat nunaqavissut angalanissaq akisugigaat. 

- Akunnittarfimmi unnuineq ullaakkorsiorneq ilanngullugu 600,00 koruuneqaraluarpalluunniit, timmisartumik nunap iluani angalaneq 6.000-10.000 koruuneqarpoq suli.

Ilulissani Hotel Arcticimi aamma susoqarpianngilaq.

Akunnittarfik Namminersorlutik Oqartussanit akuerineqaqqammerpoq takornarialerinermik suliaqartutut akinik akikilliliinermini taperneqarsinnaasunngorluni. Akuerineqareernermili ininik suli inniminniisoqarsimanngilaq.

Akunnittarfiup inaataasa 15 procentii maanna unnuiffigineqartut, akunnittarfimmi ingerlatsinermi pisortaq Morten Nielsen ilisimatitsivoq.

- Pissutsit allaalluinnartut oqarsinnaavugut. Akunnittarfiit inoqalaarput, kisianni siornatigornit inniminniisukinneruvoq, Morten Nielsen oqaluttuarpoq.

Taassuma isertuutinngilaa corona pissutigalugu akunnittarfiit inissinneri ilungersunartut. Nuna matoqqasimatillugu, nunarsuullu sinnerani nappaalanermik tunillaassortoqartillugu, takornariat tikinngitsuuipput.

- Ilungersunarpoq. Akunnittarfimmi aningaasartuutit mianersuuppagut. Soraarsitsisimanngilagut, atorfiilli inuttassarsiorsimasaraluagut suli inuttalerneqanngillat, Hotel Arcticip ingerlatsinermi pisortaa, Morten Nielsen Sermitsiaq.AG-mut ilisimatitsivoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER