Akunnerup ataatsip iluani angutit toqungasut marluk nassaarineqartut

Ullup qeqqaanerani akunnerup ataatsip ingerlanerata missaani, Sermersuumi politiit ataasinngornermi Nuummi angutit marluk toqungasut nassaaraat. Politiit tusagassiuutinut nalunaarummi allapput.

Taakku toqusut marluk imminnut attuumassuteqanngillat, pinerluttoqarsimaneranillu takussutissartaqanngitsut, angutit taakku timaat mississorneqarnerisa kingorna, politiit taama nalunaaruteqarput.

Blok 5-ip eqqaani ersinngitsoq
Siullermik angut 35-t missaani ukioqartoq Blok 5-ip eqqaani nassaarineqarpoq. Politiit misissuinerisa paasinarsitippaa, unnuap qeqqata missaani ataasinngornerup oktobarip 31-anni aamma marlunngornerup novembarip aallaqqaataata akornanni angut kingullermik takuneqartoq aalakoorsimasoq.

Taannalu silami arlaatigut ajutoorsimalluni unnuap ingerlanerani qiulluni toqusimagunarpoq.

Politiit novembarip aallaqqaataani aatsaat nalunaaqutaq 11.55 angut nassaarineqartoq nalunaarfigineqarput. Angut saneqquasunut ersippianngitsumik inissisimagunarpoq, taamaattumillu siusinnerusukkut nassaarineqarsimannginnera tamatuma nassuiaatissartaraa.

Nakorsiat akunnittarfiata eqqaani nassaarineqartoq
Akunneq ataaseq qaangiuttorlu politiit nalunaarfigineqarput, angut 65-it missaani ukioqartoq umiatsiat nunamiittut eqqaanni, nakorsiat akunnittarfiata eqqaani toqungasoq nassaarineqarsimasoq.

Tassanilu aamma politiit isumaqarput, imigassamik annertuumik aamma unnuap nillernerujussuani taanna toqquteqarsimasoq.

- Toqunerit taakku marluk pinerluttoqarnerinik pissuteqarnerat takussutissartaqanngilaq, Brian Thomsen, Sermersuup politiivineersoq oqarpoq.

- Maanna qerinnarseruttornerani aalakoornartumik imigassartorsimatilluni silamiinneq - ingammik unnuakkut - navianartortaqarpoq. Taamaammat kikkut tamaasa imminut paarilluarnissaannik kajumissaarpagut, Brian Thomsen oqarpoq.