Akunnermut 0-miit 100 kilometerimut

Nunanut allanut politikkeqarnermut sunniuteqarneruniarnermi Kalaallit Nunaat marrissimariarluni aallarsarpoq. – Maanna Danmark avaqqussinnaalerparput, Inatsisartut oqarput

Kalaallit Nunaanni nunanut allanut poltikkeqarnerujartorpoq.

Aallarniutaasumik ukiunik tallimanik utersaariarta. Novembarip 17-anut 2015-imi, taamanikkut naalakkersuinermik suliallit akunnerit marluk minutsillu 20-t atorlugit Inatsisartuni nunanut allanut nalunaarusiaq oqaluuseralugu. Tassalu taamani.

Kingorna nunarsuaq marlussoriarluni kaavissimavoq, Issittorlu qallerpaalluni, allerpaanani, nunarsuarmiunit soqutigineqarneq eqqarsaatigalugu, AG allappoq.

Ullumikkut nunanut allanut politikki taamaalilluni aamma allarluinnarmik kalaallinit isigineqalersimavoq. Sapaatit akunnerani kingullermi sisamanngornermi naalakkersuinermik suliallit Inatsisartuni nalunaarusiaq akunnerni tallimani minutsinilu 20-ni oqaluuseraat. Tassalu 2015-imiit marloriaammik sivisunerusumik.

Danmark avaqqullugu

Suliami tassani malunaateqartumik sulisoqalerpoq Steen Lyngep (D) naalakkersuisoqarfiatalu Pituffimmi isumaqatigiissut nutaaq saqqummiussinnaammassuk, siunissamilu USA-p Kalaallillu Nunaata akornanni suleqatigiinernissaq. Angusaq taamaattoq aamma sisamanngornermi sivisuumik oqallinnermi partiini oqaaseqartartunit nersualaarneqarpoq.

- Sulilluaneruvoq, angusarlu pingaarutilipilussuaq tulluussimaarutigeqaara. Maanna Danmark avaqqullugu toqqaannartumik naalakkersuisut akornanni suleqatigiittoqarsinnaavoq, Nunatta Qitornaannit Aleqa Hammond oqarpoq. Partii Naleqqamit Pele Brobergimit ilalerneqarpoq, naak taanna nalinginnaasumik Naalakkersuisunik isorinnittaraluartoq:

- Piumasaqarnissarput qunugisariaqanngilarput, uagununa nunarput. Allat nuna manna piginngilaat. Taamaattumik aamma Partii Naleqqamit nuannaarutigaarput nunarput nammineerluni Pituffik pillugu Amerikamiunik isumaqatigiissuteqarsinnaammat, Pele Broberg oqarpoq.

Allaaserineqartoq aviisimi AG-mi tamakkiisumik atuaruk. Aviisi uani pisiarineqarsinnaavoq:

Powered by Labrador CMS