Akunneq apeqquteqarfik: Akit qaffakkiartorneri nikanarsaalluni tiinganiartarnerillu oqallisaasut
Inuussutissat akitsoriartorneri aammalu nunatsinni inuit nuimasut nikanarsaallutik tiinganiarsimasut pillugit eqqartuussinerit, Inatsisartuni ullumi akunnermi apeqqarissaarfimmi oqallisigineqarput. Naaja Nathanielsen ullumi apeqqarissaarfigineqarpoq.
Ruslandip Ukrainellu akornanni sorsuttoqarnerani nioqqutissat ilaat akitsulertut nunatsinni innuttaasut qanoq malugissavaat? Nioqqutissat akitsoriartornerani immikkut ittumik ikiorsiissuteqarnissaq Naalakkersuisut eqqarsaatersuutigaat?
Aamma suliffeqarfinni sulisut nikanarsarneqarlutik tiinganiarfigitittannginnissaannut Naalakkersuisut qanoq qulakkeerinninniarpat?
Aningaasaqarnermut Naligiissitaanermullu Naalakkersuisoq, Naaja Nathanielsen (IA) pingasunngornermi nal. 10.00 akunnermi ataatsimi apeqqarissaarfigineqarmat, Inatsisartuni ilaasortat tamakkuninnga ilaatigut apeqquteqarput.
- Maluginngitsoorsinnaanngilarput Ruslandip Ukrainellu akornanni sorsuttoqarnerani nioqqutissat EU-mi akitsoriartornerat. EU-mi nioqqutissat 7,5 procentimik akitsorput. Soorunami ernumanarpoq. Eqqaamassavarpulli maannamut uagut ajunnginnerusumik inissisimagatta. Tamassumunnga aamma pissutaaqataavoq ikummatissap akii suli qaffanngimmata, Naaja Nathanielsen oqarpoq.
Akiliisinnaassuserput attatissavarput
Agathe Fontain (IA), Emanuel Núko (N), Harald Bianco (IA) aamma Mariia Simonsen (IA), nioqqutissat akitsoriartorneri, nunatta karsiata akiliisinnaassusaa aamma nioqqutissat akitsoriartornerat pissutigalugu immikkut ittumik ikiorsiissuteqalersinnaanermut tunngasunik apeqquteqarput.
- Nunatta aningaasaqarnera maanna pitsaasumik inissisimavoq. Tamannali isumaqanngilaq nunatta karsianiittut aningaasat maannakkoqqissaaq atussagigut, aningaasaqarnermi pitsaasuuginnassappat tulleriaarisariaqarpugut. Aamma siunissami. Naluarput sorsunneq qanoq ingerlajumaarnersoq, aamma naluarput tunillaassuuttoqaqqilissanersoq, Naaja Nathanielsen oqarpoq ilanngullugulu oqaatigalugu nunatsinni nioqqutissat 0,2 procentimik akitsoriarsimasut, nunarsuarmilu pisut Naalakkersuisunit malinnaavigeqqissaarneqartut.
Nioqqutissat 0,2 procentimik qaffariaateqarsimanerat Nunatta Naatsorsueqqissaartarfianit tigusaapput. Kisitsisit nioqqutissat akiinut pr. 1. januar 2022-mi naatsorsuunneqarput, ukiup siulianut sanilliunneqarlutik.
Nikanarsaalluni tiinganiartoqartillugu akiligassiineq
Inatsisartuni ilaasortat ilaasa apeqqutigaat suliffeqarfinni nikanarsaalluni tiinganiartoqarsimatillugu kinguneqartitsisarnissanik Naalakkersuisut eqqarsaateqarnersut.
Kuno Fenckerip (S) nunatsinni inuit nuimasut suliffimmi tiinganiartarsimasutut eqqartuussaasimasut ilaatigut taavai.
Taassuma Inatsisartunilu ilaasortat allat paaserusuppaat suliffeqarfimmi naligiissitaanerulernissaq pillugu, aammalu nikanarsaalluni tiinganiartoqarsimatillugu suliffeqarfik akiligassinneqartalissanersoq:
- Suliat maannakkorpiaq pisuupput. Maanna takusinnaavagut allannguuteqartoqartariaqarnersoq naligiissitaanermut inatsimmi, sulisoqarnermut inatsimmi aamma pinerluttulerinermut inatsimmi. Pinerluttulerinermut inatsit allanngortikkumagutsigu Danmarkimut saaffiginnissaagut. Aammali alla eqqarsaatigisariaqangarput tassaavoq inuiaqatigiinni pissusilersuutit suut allanngortinniartariaqarnerigut, nikanarsaalluni tiinganiartoqartassanngippat, Naaja Nathanielsen oqarpoq.
Nikanarsaalluni tiinganiarneq pillugu paragraffi
Naalakkersuisup erseqqissarpaa suliffeqarfiit akiligassitsinneqartalernissaannut oqallinneq soqutiginarluinnartoq, itisilernaguli Naalakkersuisut taama suliniuteqalersaarnersut.
Inuit nikanarsaallutik tiinganiarsimasut eqqartuussivimmut sassartinneqartalernissaannik siunertaqartumik pinerluttulerinermi inatsimmi paragraffeqalissanersoq apeqqut, Naalakkersuisup aamma ersarissumik akinngilaa. Eqqartuussinerit kingulliit kinguaassiuutitigut kannguttaatsuliorsimaneq aallaavigalugu eqqartuussinerupput.