Akunnaalliliineq nunarsuarmi takutitseqqaarnermik malunnartinneqassaaq
Nunatta Isiginnaartitsisarfiata pilersinneqarneraniit ukioq manna ukiut qulinngorput. Tamanna isiginnaartitsisarfiup angakkunngorniaq inuusuttoq Pitu taassumalu angakkussarneranik isiginnaagassiaq nutaarluinnaq »Angakkussaq« aqqutigalugu ilaatigut januaarimi nalliussineqassaaq.
2021 Nunatta Isiginnaartitsisarfianut ukiuuvoq immikkuullarissoq.
Aviisi AG taama allappoq.
Januaarip aallaqqaataani isiginnaartitsisarfeqarnermut inatsit ukiut qulit matuma siorna atuutilerpoq taamaalillunilu isiginnaartitsisarfik pisortani sullissivittut namminersortutut aningaasanut inatsimmi aningaasaliiffigineqartutut pilersinneqarluni. Sullissivik ukiut ingerlaneranni inuiaqatigiinni assigiinngitsutigut maluginiarneqarneruleriartuaarsimavoq, Nuummi Industrivejimi illumi biilileriffimmik qaninnerpaatut sanileqarluni pissusissamisoornerpaanngitsunik sinaakkuteqaraluarluni.
- Ukioqqortorsiortarneq malillugu amerlanertigut pisartutut piginnaasatigut ineriartorsimavugut. Tamatuma kinguneranik pitsaalluinnartunik isiginnaagassiaateqalersimavugut. Kisianni isiginnaartitsineq kulturikkut kingornussarsiatut immikkut aallullugu sammisassaqartitsinerit aamma amerliartorsimapput. Tamanna tulluusimaarutigaara, isiginnaartitsisarfiup pisortaa Susanne Andreasen oqarpoq, Isiginnaartitsinermillu Ilinniarfik, ineriartorsimasoq ukiunilu pingasuni eqqumiitsuliornikkut bacheloritut ilinniakkatut inissisimalernissaminik Namminersorlutik Oqartussanut qinnuteqaatigineqarsimasoq, oqaatigalugu.
Nunatta Isiginnaartitsisarfia nunani allani aamma pingaartinneqaleriartorsimavoq.
Angakkussaq nunarsuarmi takuteqqaarneqassasoq
Nunatta Isiginnaartitsisarfianut ukiut siulliit qulit ukiup ingerlanerani siunniussat annertuut assigiinngitsut aqqutigalugit malunnartinneqassaaq.
Isiginnaartitsisarfiup januaarip qaammataani nunarsuarmi takuteqqaarneqartussaq isiginnaartitsissutigissaavaa: »Angakkussaq«, 28-nik ukiullip Aviaq Johnstonip, Nunavummi Igloolimmi peroriartorsimasup, ullumikkullu Iqalunni Québecimilu najugaqartup, atuakkiaqqaataanik »Those who run in the sky«-mik (arsarnernik arpaqateqartut) tunngaveqartoq.
Atuakkiaq isiginnaagassiarlu ineriartornermik oqaluttuaavoq, tassanilu angukkunngorniaq inuusuttoq Pitu, angakkussarnermini nukimminik piginnaanerminillu atuinissaminik ilinniartilluni sorpassuarnik aqqusaagaqartussaq, malittarineqarluni.
Aviisimi AG-mi atuarnerusinnaavutit. Aviisi uani pissarsiariuk: