Akuersissutinik tunniussisarunnaarneq: Aalisartut kiffaanngissusiiangaasutut misigisut
Qaleralinniarnermut akuersissutinik agguaassisarnerup Naalakkersuisunit killilersuiffigineqarnera, aalisartuniit aalisartullu kattuffiiniit kukkunertut isumaqarfigineqarpoq.
Ukioq manna novemberi aallarnerfigalugu Naalakkersuisut aalajangerput aqutsiveqarfimmi 47-mi, Upernavimmi angerlarsimaffillit pinnagit, qaleralinniarsinnaanermut akuersissutinik nutaanik tunniussisarneq april 2022-p tungaanut unitsinneqassasoq.
Aviisi Sermitsiaq taama allappoq.
Aalisarsinnaanermut akuersissutinik tunineqartartut ukiut tamaasa amerliartorput, tamanna imaani pisuussutinut annertuumik sunniuteqarpoq.
Qalerallit pisassiissutigineqartartut ilisimatuussutikkut siunnersuisarnernit amerlanerujussuanngorlugit aalajangersaavigineqartarput, Naalakkersuisullu isumaqarput pisarineqarsinnaasut umiatsiaararsortullu amerlassusaat naapertuukkunnaarsimasut.
Aqutsiveqarfik Qeqertarsuup Tunuani umiatsiaaqqamik aalisarsinnaanermut akuersissutit 2013-imit 2018-imut 188-init 297-inut amerleriarput, kiisalu Aqutsiveqarfik Uummannami pissaffimi tassani 227-nit 301-inut amerleriarsimallutik.
Qaleralinnilli akuersissutinik tunniussisarnerup unitsikkallarneqarnera aalisartunngorusuttut siunissaannut annertuumik killilersuisoq, sinnattullu piviusunngorsinnaajunnaarnerannik kinguneqartoq, aalisartoq namminersulerusukkaluartoq, 32-nik ukioqartoq Erni Wæver, Sisimiuni najugaqartoq oqarpoq. Taannalu aalisartut kattufiiniit taperserneqarpoq.
Sinnattut piviusunngornngitsoortut
Erni Wæver inuusuttuaraallunili sinerissap qanittuani aalisariutini aammali avataasiutini inuttaasarnikuuvoq. Angallatinilu inuttaaneq taamaallaat killilimmik inuuniutigineqarsinnaavoq.
– Qangali takorluugarinikuugaluarakku nammineerlunga aalisarnermik, minnerunngitsumillu qaleralinniarnermik inuussutissarsiuteqalernissara, kisianni Naalakkersuisut aaliangernerat, nammineersinnaannik annertuumik killilersuivoq, kiffaanngissusiiagaasutullu misigisimanarpoq, taanna oqarpoq.
Aviisimi Sermitsiami atuarnerusinnaavutit, aamma aalisartut kattuffii qanoq isumaqarnersut atuarsinnaavat. Aviisi uani pissarsiariuk: