Akuersissuteqaqqaartarnissaq pillugu inatsit akuerineqartoq: Inuttut killiliussat amerlanerusunit ataqqineqassapput
Akuersissuteqaqqaartarnissaq pillugu inatsisissatut siunnersuut, kinguaassiuutitigut innarliisoqarsinnaanerani pinaveersaartitsisussaq akuersissutigineqarpoq. Inatsit nunami maani atuutsilernagu Folketingimut saqqummiunneqaqqaassaaq.
Akuersissuteqaqqaartarnissaq pillugu inatsisissatut siunnersuut akuersissutigineqarpoq.
Tamanna Inatsisartut ukiakkut ataatsimiinneranni marlunngormat pivoq, taamaalilluni inummik akuersissuteqaqqaarsimanngitsumik atoqateqarneq pinerluuteqarnertut taaneqartalissaaq.
Tassa nukersorlun, qunusaaraluni pinngitsaaliilluniluunnit atoqateqarsimaneq - imaluunniit inummik imminut ikiorsinnaanngisumik atoqateqarsimaneq kisimik pineqaatissiissutaasassanngillat. Naamik.
Matumani aamma pineqarpoq: Akuersissuteqaqqaarpa?
Akuersissuteqartoqarsimanngippat pinngitsaaliilluni atoqateqarsimaneq pineqassaaq.
Amerlanerussuteqartut isumaqataasut
Naalakkersuisut ataatsimiititaliap isumaqatigiittup siunnersuumut akuersaarsimanera nuannaarutigaa, siunnersuut Inuit Pisinnaatitaaffii pillugit Suliniaqatigiiffimmit siuariarnertut qanittukkut oqaatigineqarpoq.
Aatsitassanut Inatsisinillu Atuutsitsinermut Naalakkersuisoqarfimmi inatsisissatut siunnersuummut isumaliutissiissummi ilisimatitsissutigineqarpoq, Sapaatip Akunnerani Seximi aallartinneqartussatut, ukiumi sapaatit akunnerisa arfernganni pisussatut, paasititsiniaasoqarnissaa pilersaarutaasoq, tassanilu siornatigutut kinguaassiutitigut peqqissuunissaq ukkatarineqartussaasoq.
- lnuusuttut ilisimasaat paasissutissallu massakkut pissarsiarissallugit pisariaqartitaat sammisani paasititsiniaanermi tunngavigineqarlutik ukkatarineqartussaapput, isumaliutissiissummi oqaatigineqarpoq.
Tamatuma saniatigut atuartunut angajullernut kiisalu GU-mi atuartunut allanut, inuusuttut ilinniarfiinut allanut suliffeqarfinnullu toraarinnittunik paasisitsiniaanissaq pillugu Paarisap llinniartitaanermut Aqutsisoqarfik suleqatiginiarlugu aallartinniarpaa.
llinniartitsinissamut atortut killiliisarneq peqqissumillu atoqatigiittarneq oqaasertalersussavaat.
Inuttut killiliussat
Inatsisinut Ataatsimiilitaliamit Naalakkersuisunut kaammattuutigineqarpoq, inersimasunut sammiveqartumik paasisitsiniaanermik aamma suliaqassasut, tassungalu aningaasanik pisariaqartinneqartunik immikkoortitsissasut. Naalakkersuisut inuusuttunut inersimasunullu paasititsiniaasoqarnissaa isumaqatigaat.
Aatsitassanut Inatsisinillu Atuutsitsinermut Naalakkersuisoqarfimmit ilisimatitsissutigineqarpoq, Justitsministeriaqarfimmit ministereqarfiup ataani oqartussaasut, taakkununnga ilanngullugit politiini eqqartuussiveqarfinnilu sulisut taakkuninnga atuinnissinnaanissaannut piareersartinneqarniartut.
Najukkani eqqartuussisut ilinniarteqqinneqarnerannut atatillugu ilinniartitsinermi taamaalilluni akuersissuteqaqqaarnissamik tunngavilimmik pinngitsaaliilluni atoqatiginninneq pillugu aalajangersagaq pillugu saqqummiussisoqareersimasoq ilisimatitsissutigineqarpoq.
Najortit
Naalakkersuisunit oqaatigineqarpoq, inuit amerlanerit pineqaatissinneqartarnissaat anguniagaanngitsoq: Anguniagaavoq inuit amerlanerit inuttut killiussanik ataqqinninnissaat, innarliisoqanngittarniassammat.
Pinerlineqartup naammattumik tapersersorneqarnissaa ilitsersorneqarnissaalu suliassaasoq pingaaruteqartoq Naalakkersuisut isumaqarput - ingammik tamanna Kalaallit Nunaanni eqqunngitsuliorfigineqartumut eqqartuussissuserisunik ikiuuttussanik peqannginnera eqqarsaatigalugu.
- Kisianni amerlassusilinnik pinerlineqartunut toqqammavigisassatut peqannginnera unammilligassaavoq, taamaalillunilu naammattunik illersuisunik taakku inuttassarsiorneqarnissaasa annertunerusumik ukkatarineqarnissaat Naalakkersuisut kissaatigaat. lnuttassarsiuinermi akissarsiaritinneqartut pingaarutilittut ilaapput, taamaammallu immikkut tassunga aningaasaliisoqartariaqarpoq.
Inatsisissatut siunnersuut akuersissutigineqaqqammerpoq, maannalu Folketingimut saqqummiunneqassalluni. Pinngitsaaliilluni atoqateqartarneq pillugu inatsisip allannguutaa 2023-mi atuutsinneqalissasoq naatsorsuutigineqarpoq.